Eminem-მა Slim Shady-სთვის დამახასიათებელი კლასიკური სტილი სინგლში Madara გააცოცხლა, რომელიც Shady Records-ის არტისტ Ez Mil-თან ერთად ჩაწერა. Naruto-თი შთაგონებული კომპოზიცია 9 ოქტომბერს გამოვიდა. ჩანაწერში ასევე მონაწილეობენ იაპონელი რეპერი Hideyoshi და ნილ კაპლანი, მსახიობი, რომელიც ანიმეში Madara Uchiha-ს პერსონაჟს ახმოვანებს.
თანმხლებ ვიზუალში Eminem ანიმეს სამყაროში გადადის. რეპერი, როგორც ჩანს, ვოკალზე ინტენსიურ ფილტრს იყენებს, რათა მსმენელს Slim Shady-ს ძველი, კლასიკური სტილი გაახსენოს, რამაც სოციალურ ქსელებში გულშემატკივრების არაერთგვაროვანი გამოხმაურება გამოიწვია.
მიუხედავად ამისა, Eminem-ის რეპი კვლავ სიზუსტითა და სწრაფი ტემპით გამოირჩევა. არტისტი დღესაც ახერხებს, რეპში გაცილებით ახალგაზრდა კოლეგებს აჯობოს. Eminem რეპავს და საკუთარ მწვავე, აგრესიულ რიტორიკას Kanye West-ის ემოციურ ტექსტებსაც ადარებს.
მიუხედავად იმისა, რომ Eminem ჰიპ-ჰოპის ვეტერანად მიიჩნევა, ტექსტში ხაზგასმით აღნიშნავს, რომ ნებისმიერ დროს მზად არის რეპ-ბეთლისთვის და მუსიკალური დაპირისპირებისთვის.
Eminem კარიერის ადრეულ პერიოდსაც იხსენებს და საუბრობს იმ ეჭვებზე, რომლებიც მის მიმართ არსებობდა, რა დროსაც თავდაჯერებას კარგავდა. კრიტიკოსების გავლენით, მას უჭირდა იმის დაჯერება, რომ ისეთი გავლენიანი არტისტი, როგორიც Dr. Dre არის, მის ნიჭსა და შესაძლებლობებს დაინახავდა. დეტროიტელი რეპერის აღმოჩენის შემდეგ, Dr. Dre-მ 1998 წელს Eminem-ს საკუთარ ლეიბლზე, Aftermath Entertainment-ზე, კონტრაქტი გაუფორმა.
სიმღერა Madara Ez Mil-ის EP-ში – 3RD WRLD VOL. 2-ში შევა, სადაც Eminem თანაპროდიუსერის როლშიც გვევლინება.
ცნობისთვის, Eminem-ს 2026 წელს სოლო სინგლი არ გამოუშვია, თუმცა რეპის ლეგენდის მსმენელებს ახალი ვერსის მოსასმენად დიდხანს ლოდინი არ მოუწევთ. არტისტი ასევე თანამშრომლობს Kid Rock-თან კომპოზიციაზე 7 Sins, რომელიც მიჩიგანელი მუსიკოსის ალბომ – Halfway to Jesus-ში შევა და 17 ოქტომბერს გამოვა.
გარდა ამისა, 50 Cent-მა დააანონსა, რომ Street Fighter-ის საუნდტრეკზე Eminem-თან ითანამშრომლებს. ალბომის გამოსვლა ფილმთან ერთად, 16 ოქტომბერს იგეგმება.
ოსკაროსანი რეპერის ბოლო ალბომი The Death of Slim Shady (Coup de Grâce) 2024 წლის ივლისში გამოვიდა. Luminate-ის მონაცემებით, ჩანაწერმა Billboard 200-ის ჩარტში პირველი ადგილი დაიკავა და გამოსვლის პირველივე კვირაში ალბომის 281 000 ერთეული გაიყიდა.
მოუსმინეთ Madara-ს.
