ჯასტინ ტიმბერლეიკმა „ნიკოლ ჰერსტის სახელობის სტიპენდია“ დააწესა.სტიპენდია ორ სტუდენტს საშუალებას მისცემს, რომ ცნობილ მუსიკის სასწავლებელში 1500 Sound Academy-ში დაფინანსებით ისწავლონ. 1500 Sound Academy ერთ-ერთი ყველაზე ავტორიტეტული თანამედროვე მუსიკის აკადემიაა. მისი ფილიალები კალიფორნიასა და ტაივანის დედაქალაქ ტაიპეიში მდებარეობს. სტიპენდია ტიმბერლეიკის ვოკალისტების გუნდის ერთ-ერთი წევრის, ნიკოლ ჰერსტის ხსოვნას ეძღვნება. ჰერსტი 2021 წელს მკერდის კიბოს დიაგნოზით გარდაიცვალა.
„ჩვენი ტენესელი მეგობრის ხსოვნისათვის. იმ ქალისათვის, რომელიც მუსიკით ცხოვრობდა. ერთ-ერთი ყველაზე გამორჩეული ხმისა და ღიმილის პატრონის ხსოვნისათვის, რომელიც სამყაროს ოდესმე უნახავს – მოხარულები ვართ გამოვაცხადოთ – „ნიკოლ ჰერსტის სახელობის სტიპენდია“ ორ ახალგაზრდა შემოქმედს დააფინანსებს, რომ 1500 Sound Academy-ის კურსი გაიაროს.“ – აღნიშნა ჯასტინ ტიმბერლეიკმა ინსტაგრამზე გამოქვეყნებული ვიდეოს აღწერაში. ვიდეოში მომღერალი ამ სტიპენდიაზე და მის შესაძლებლობებზე საუბრობს. „ნიკოლის ხსოვნა მუდამ იარსებებს.“- წერს მომღერალი.
გამოქვეყნებულ ვიდეოში ჯასტინ ტიმბერლეიკი სიმღერების ავტორ ჯეიმს ფონტლეროისთან და ლარენს „რენს“ დოპსონთან ერთად გამოჩნდა. ორივე მათგანი გრემის მფლობელი მუსიკოსია და ისინი 1500 Sound Academy-ს უძღვებიან.
სტიპენდიის მიღების მსურველებმა განაცხადის 2023 წლის 26 აპრილამდე უნდა შეიტანონ. ორი გამარჯვებული 13 მაისს გამოვლინდება.
ნახეთ ვიდეო, რომელშიც ჯასტინ ტიმბერლეიკი „ნიკოლ ჰერსტის სახელობის სტიპენდიის“ შესახებ საუბრობს:
