13 აპრილს Left Bank-ში ქართველი არტისტის, Aine Merme-ს მუსიკალური საღამო გაიმართა. Aine Merme მუსიკოსის, სიმღერების ავტორისა და მწერლის, ნატუკა ნაცვლიშვილის სასცენო სახელია.
Aine Merme-ს მუსიკალური ბექგრაუნდი საკმაოდ მრავალმხრივია. მან გიტარაზე დაკვრა 14 წლის ასაკში დაიწყო და მალევე აღმოჩნდა თბილისის პანკ-მუსიკის გარემოცვაში. მისი მუსიკა, ატიპიური შესრულების მანერა და სტილი ხშირად არღვევს სიმღერის კლასიკურ სტრუქტურას.
Aine Merme Left Bank-ის ღია სივრცეში აუდიტორიის წინაშე ხატია ქორიძესთან (ბასი) ნიკა გაბაძესთან (გიტარა) და სოსო ცაგარეიშვილთან (დრამი) ერთად წარდგა, სადაც ძველი და ახალი კომპოზიციები შეასრულა.
Aine Merme-ს საავტორო მუსიკა არ ჯდება ერთ რომელიმე კონკრეტულ ჟანრში, მისი საშემსრულებლო მანერა და დამახასიათებელი უჩვეულო ჟღერადობა მსმენელში ყოველთვის განსხვავებულ ემოციას აღძრავს. მინორული მელოდიები და ღრმა შინაარსიანი ტექსტები Aine Merme-ს შინაგან სამყაროს ნათლად აჩვენებს.
Aine Merme (ნატუკა ნაცვლიშვილი)
„ამ ლაივზე ორი კომპოზიცია გაჟღერდა EP-დან, რომელიც უახლოეს მომავალში დარელიზდება. ახალი EP სულ ოთხი სიმღერისგან შედგება რომელიც მუსიკის ჩემეულ აღქმას ასახვას და ინსტრუმენტული მუსიკის შესაძლებლობებს სხვადასხვა ეპოქის ჟანრების მიჯნაზე იკვლევს.“
ვინც Left Bank-ში Aine Merme-ს ლაივზე ვერ მოახერხეთ მისვლა, მის ლაივ პერფორმანსზე დასწრების შესაძლებლობა უახლოეს მომავალში მოგეცემათ, ასე რომ თვალი ადევნეთ მის გვერდს და გაიგეთ სად ჩატარდება Aine Merme-ს მომდევნო მუსიკალური საღამო.
მოისმინეთ Aine Merme-ს სიმღერა All you have to do
