ამერიკული ალტერნატიული როკ-ჯგუფის, The Hole-ის ვოკალისტმა კორტნი ლავმა ბრიტანულ გამოცემა The Standard-თან ინტერვიუს დროს ქალ შემსრულებლებზე ისაუბრა. მისი თქმით, ის პატი სმიტის, ნინა სიმონეს, პიჯეი ჰარვის და დები ჰარის გულშემატკივარია, თუმცა ტეილორ სვიფტი არ მოსწონს.
„ტეილორ სვიფტი არ არის მნიშვნელოვანი არტისტი. ის შესაძლოა უსაფრთხო სივრცეა პატარა გოგონებისთვის, ალბათ ახალი თაობის მადონაა, მაგრამ ჩემი აზრით საინტერესო არტისტი არ არის. არ მომწონს ლანა დელ რეიც. მას შემდეგ, რაც მან ჯონ დენვერის სიმღერა შეასრულა, ნამდვილად ვფიქრობ, რომ შვიდწლედის განათლება უნდა მიიღოს. სანამ ლანა დელ რეი სიმღერა Take Me Home Country Roads-ს შეასრულებდა, მანამდე ვფიქრობდი, რომ ძალიან კარგი მომღერალი იყო. როცა ახალ ალბომზე ვმუშაობდი, მომიწია კიდეც, რომ ლანა დელ რეისთვის არ მესმინა, რადგან ის ჩემზე ზედმეტად დიდ გავლენას ახდენდა.“ – თქვა კორტნი ლავმა გამოცემასთან ინტერვიუს დროს.
ინტერვიუს ბოლოს კორტნიმ დაამატა, რომ არც მადონას გულშემატკივარი იყო: „მე ის არ მომწონს და ვიცი, არც მას მოვწონვარ.“ – ამბობს კორტნი.
მიუხედავად იმისა, რომ კორტნი ლავი ბევრ ქალ შემსრულებელს აკრიტიკებს, იგი ყოველთვის მხარს უჭერს ქალ არტისტ- შემსრულებლებს. 2023 წლის მარტში როკ-მუსიკოსმა Guardian-ისთვის რეზენცია გამოაქვეყნა, რომლის მთავარი მიზანი როკ-ენ-როლის დიდების დარბაზში ქალ შემსრულებელთა ნაკლებობის ხაზგასმა იყო. სტატიის სათაურია „რატომ არიან ქალი შემსრულებლები როკ-ენ-როლის დიდების დარბაზის მიერ მარგინალიზებულნი“.
კორტნი ლავის თქმით, ამ სტატიამ ნამდვილად დიდი გავლენა მოახდინა, რადგან 2023 წლის ნომინაციების მიხედვით როკ-ენ-როლის დიდების დარბაზის 40-წლიან ისტორიაში ამ წელს ყველაზე მეტი ქალი შემსრულებელი იყო ნომინირებული.
„თუ როკ-ენ-როლის დიდების დარბაზს არ სურს დაინახოს, თუ როგორ იმეორებს სტრუქტურული რასიზმის და სექსიზმის ძალადობას, რომელსაც ქალი არტისტები მუსიკალურ ინდუსტრიაში აწყდებიან, თუ არ შეუძლიათ სათანადო პატივი მიაგონ და დაინახონ, თუ რა შექმნეს ინოვაციურმა ქალმა არტისტებმა, მაშინ ჯოჯოხეთამდეც გზა ჰქონიათ.“ – ასე ასრულებს კორტნი ლავი Guardian-ისთვის დაწერილ რეცენზიას.
