კეტი პერი Blue Origin-ის კოსმოსური ხომალდით, მხოლოდ ქალებისგან შემდგარ ეკიპაჟთან ერთად კოსმოსში გაფრინდა. ხომალდი ტეხასში მდებარე ჯეფ ბეზოსის კომპანიის ობიექტიდან აფრინდა. გაშვებამდე CBS-მა აჩვენა კადრები, სადაც ეკიპაჟის წევრები ფანჯრებიდან იყურებოდნენ და მაყურებლებს ესალმებოდნენ. გაშვებიდან თითქმის სამი წუთის შემდეგ, დაახლოებით 100 კილომეტრის სიმაღლეზე, ხომალდი გამშვებ ბუსტერს გამოეყო.
პერისთან ერთად ხომალდზე იმყოფებოდნენ ჯეფ ბეზოსის მეგობარი ქალი ლორენ სანჩესი, CBS-ის წამყვანი გეილ კინგი, აერონავტიკის ინჟინერი აიშა ბოუ, სამოქალაქო უფლებების აქტივისტი და ნობელის პრემიაზე ნომინირებული ამანდა ნგუიენი და პროდიუსერი კერიენ ფლინი. კაფსულის გამოყოფის მომენტი CBS-ის კამერებმა დააფიქსირეს.
ეკიპაჟი დაახლოებით სამი-ოთხი წუთით უწონადობის მდგომარეობაში იყო. კოსმოსიდან დედამიწის ხილვით აღფრთოვანებული ეკიპაჟის წევრების რეაქციები ეთერშიც მოხვდა. ამის შემდეგ ხომალდი დედამიწაზე უსაფრთხოდ დაბრუნდა. კაფსულის კარი ჯეფ ბეზოსმა გახსნა. კეტი პერი პატარა გვირილით ხელში გამოვიდა, სავარაუდოდ, ეს მისი ქალიშვილის, დეიზისადმი მიძღვნილი ჟესტი იყო. შემდეგ კი მუხლებზე დაიჩოქა და მიწას აკოცა.
11Alive-თან ინტერვიუში გეილ კინგმა თქვა: „ჯერ კიდევ არ მჯერა, რომ ეს მოხდა.” მისი თქმით, ფრენის ინსტრუქტორმა ყველაზე წარმატებული მოსწავლე უწოდა, რადგან ეშინოდა, მაგრამ მაინც გაბედა.
კინგის თქმით, პერიმ უკან დაბრუნებისას ლუი არმსტრონგის ცნობილი სიმღერის “What a Wonderful World”-ის მცირე ნაწყვეტი იმღერა. „ყველა სთხოვდა, რომ Roar ან Firework ემღერა,“ – აღნიშნა კინგმა.
პერიმ ცრემლები ვერ შეიკავა, როცა გაიგო, რომ მისი შვილი სიამაყით ადევნებდა თვალს დედის კოსმოსში გაფრენას. კოსმოსში გამგზავრებასა და დაბრუნებაზე საუბრისას პერიმ თქვა, რომ ეს „ყველაზე ძლიერი განცდა“ იყო. „ეს ყველაფერი მხოლოდ კოსმოსში გაფრენა არ არის – ეს არის მომზადება, გუნდი, ნდობა,” – აღნიშნა მან. პერის თქმით, კოსმოსში ნამღერი “What a Wonderful World” სწორედ კოლექტიურ ენერგიას და იმ ქალებს მიუძღვნა, ვისაც სურს, სამყაროში საკუთარი ადგილი დაიმკვიდროს.
კეტი პერის თქმით, მომავალში აუცილებლად დაწერს სიმღერას ამ გამოცდილებაზე. მომღერალმა ფრენის დროს მისი მომავალი ტურნეს სიმღერების სიაც გაამხილა.
სანჩესმა კი თქვა: „არ ვიცი, როგორ აღვწერო. მთვარე დავინახეთ, სავსე მთვარე. დედამიწა ისე მშვიდად ჩანდა. ირგვლივ სიმშვიდე იყო. ბევრად შთამბეჭდავი აღმოჩნდა, ვიდრე წარმომედგინა.“
წინა კვირას, Associated Press-თან საუბრისას, კეტი პერიმ განმარტა, თუ რატომ გადაწყვიტა გაფრენა: „ყოველდღე საკუთარ თავს ვეუბნები: შენ გაბედული ხარ. შენ ამას აკეთებ მომავალი თაობის შთაგონებისთვის, განსაკუთრებით
გოგოებისთვის. მე კოსმოსში გავფრინდები! – არანაირი საზღვრები. ძალიან მაინტერესებს ტექნიკური მხარე, STEM-ის სფერო და ყველაფერი, რაც ასეთი წარმატებული მისიის განხორციელებისთვისაა საჭირო,” – თქვა მომღერალმა.
იხილეთ ეკიპაჟის კოსმოსში გაშვების ვიდეო:
