მიუხედავად იმისა, რომ ჯერ ცნობილი არ არის, როდის გამოვა გრეისი აბრამსის 2024 წლის ალბომის, The Secret of Us-ის გაგრძელება, მომღერალი და სიმღერების ავტორი მოუთმენლად ელის, მსმენელს ახალი ნამუშევარი გაუზიაროს.
„უკვე სრულიად მზად ვარ, რომ ეს ყველას საკუთრება გახდეს,” – განაცხადა გრეისი აბრამსმა ჟურნალ People-თან ინტერვიუში 7 იანვარს, ლოს-ანჯელესში, Chateau Marmont-ში გამართულ Chanel-ის ღონისძიებაზე.
“ასეთი შეგრძნება არცერთ სხვა ნამუშევარზე არ მქონია, ამიტომ ეს, კარგი გაგებით, მაფორიაქებს.” – დაამატა მან თავის მესამე ალბომზე საუბრისას.
გრეისი აბრამსს ჯერ არ გაუმხელია, ამჯერად ვისთან ერთად მუშაობს სტუდიაში, თუმცა მისი პირველი ორი სრულმეტრაჟიანი ალბომი: Good Riddance (2023) და The Secret of Us (2024), რომელიც Billboard 200-ის ჩარტში მეორე ადგილზე მოხვდა, პროდიუსერ აარონ დესნერთან (The National-ის წევრი) თანამშრომლობით შეიქმნა.
ჯერჯერობით არაფერია დადასტურებული იმის შესახებ, თუ რა შეიძლება მოისმინონ გულშემატკივრებმა გრეისი აბრამსის ახალ ალბომში, თუმცა ზაფხულში მან ორი გამოუქვეყნებელი სიმღერა ცოცხლად შეასრულა: Out of Nowhere Glastonbury-ს ფესტივალზე და ,Crazy Girl – BST Hyde Park-ზე. 2025 წლის დასაწყისში მისი კიდევ ერთი კომპოზიციის, Death Wish-ის დებიუტი შედგა. სიმღერა ცოცხლად ჩაიწერა არტისტის The Secret of Us Tour-ის ფარგლებში, დიდ ბრიტანეთში გამართულ კონცერტზე, და აპრილში პრომო-სინგლის სახით გამოვიდა.
გრეისი აბრამსი მარტში, 2025 წლის Billboard Women in Music Awards-ზე წლის სიმღერების ავტორად (Songwriter of the Year) დასახელდა.
