დუა ლიპა ეპშტეინის ფაილების გარშემო არსებულ დისკუსიებს აკრიტიკებს და ფიქრობს, რომ ეს ყველაფერი მოკლებულია იმ მსხვერპლთა მდგომარეობის გააზრებას, რომლებიც ამ ფაილებში არიან ნახსენები და რომელთა შორისაც ბევრი არასრულწლოვანია.
პოპვარსკვლავის პოდკასტის ბოლო ეპიზოდში ლიპას სტუმრად ჰყავდა ავტორი როქსან გეი. მასთან საუბრისას კი მომღერალი შეეხო გარდაცვლილი მილიარდერისა და სექსუალურ დამნაშავედ ცნობილი ჯეფრი ეპშეტეინის თემას. „ის, თუ როგორ გაშუქდა ეს დანაშაული და ის ენა, რომელიც იქნა გამოყენებული, ძალიან ცუდ საქმეს უკეთებს ყველა მსხვერპლს,” – თქვა ლიპამ.
„სულ ვსაუბრობთ იმ ისტორიებზე, რომლებიც არასრულწლოვან გოგონებსა და სექსწვეულებებს ეხება, ნაცვლად იმისა, რომ დაწერონ იმ ადამიანებზე, რომლებიც ბავშვობაში ტრეფიკინგის მსხვერპლები გახდნენ. თითქოს ყველაფერს ერთგვარი ფარდის მიღმა აქცევენ, რათა დაიცვან – არ ვიცი ვინ, შეიძლება მკითხველიც – ან შენიღბონ ის, რაც რეალურად ხდება.”
ეპშტეინმა სიცოცხლე სუიციდით დაასრულა, როცა 2019 წელს საპატიმროში სასამართლო პროცესს ელოდებოდა. ის სექსტრეფიკინგის ბრალდებით იყო დაკავებული, რაც არასრულწლოვნებსაც მოიცავდა, რასაც თავად ეპშტეინი არ აღიარებდა. მანამდე მან 13 თვე გაატარა ციხეში, არასრულწლოვნისგან პროსტიტუციის მოთხოვნის ბრალდებით.
დუა ლიპას მოსაზრება ეხება ეპშტეინის საქმესთან დაკავშირებულ მილიონობით ფაილს, რომლებიც 30 იანვარს გამოქვეყნდა და რომლებიც ფოკუსირებულია ეპშტეინსა და მის პარტნიორ გისლეინ მაქსველთან დაკავშირებულ რამდენიმე ცნობილ სახეზე და არა თავად მსხვერპლებზე. მაქსველს ამჟამად 20 წლით თავისუფლების აღკვეთა აქვს მისჯილი. დონალდ ტრამპი, ბილ კლინტონი, ილონ მასკი, ბილ გეიტსი და პრინცი ენდრიუ – ყველა ეს ადამიანი დოკუმენტებში ფიგურირებს მიუხედავად იმისა, რომ ყველა მათგანი უარყოფს ეპშტეინთან დანაშაულებრივ კავშირს.
რაც შეეხება მუსიკალურ სამყაროს, ცოტა ხნის წინ კეისი ვასერმანმა თავისი სააგენტო გაყიდა, რომელშიც გაერთიანებული იყვნენ ისეთი არტისტები, როგორებიც არიან ჩაპელ როუნი, ორვილ პეკი და ჯიჯი პერესი. ყველა მათგანმა დატოვა კომპანია მას შემდეგ, რაც ეპშტეინის ფაილებში ვასერმანისა და მაქსველის 2003 წლის იმეილები გამოქვეყნდა. ახალი ამბის საპასუხოდ ვასერმანმა დაწერა: „ძალიან ვნანობ გისლეინ მაქსველთან ჩემს კომუნიკაციას, რომელიც ორი დეკადის წინ შედგა – დიდი ხნით ადრე, სანამ მისი საზარელი დანაშაული გამომზეურდებოდა. მე არასდროს მქონია პირადი ან საქმიანი ურთიერთობა ჯეფრი ეპშტეინთან.”
დუა ლიპა არასდროს ერიდებოდა თავისი აზრის გამოხატვას რთულ პოლიტიკურ საკითხებზე. წლების განმავლობაში ის მხარს უჭერს პალესტინელ ხალხს და საუბრობს ღაზას ჰუმანიტარულ კრიზისზე.
ბოლოს მან ახალი მუსიკა 2024 წელს გამოსცა – ალბომი Radical Optimism, რომელიც Billboard 200-ის მეორე ადგილზე გავიდა.
ნახეთ დუა ლიპას პოდკასტი:
