Bad Bunny საკულტო მულტფილმის – „სათამაშოების ისტორიის” ახალ პერსონაჟს გაახმოვანებს. ანიმაციურმა სტუდია Pixar-მა 26 მაისს გამოაცხადა, რომ პუერტო-რიკოელი სუპერვარსკვლავი „სათამაშოების ისტორიის“ მეხუთე ნაწილის გამხმოვანებელ მსახიობთა გუნდს შეუერთდა და ის გააცოცხლებს პერსონაჟს, სახელწოდებით Pizza with Sunglasses. სტუდიამ ინსტაგრამის ოფიციალურ გვერდზე პერსონაჟის ვიდეოც გამოაქვეყნა.
მომღერლის კავშირი „სათამაშოების ისტორიის“ სამყაროსთან რამდენიმე წელს ითვლის. მანამ, სანამ მას მთელი მსოფლიო გაიცნობდა, არტისტმა სოციალურ ქსელებში თავის გამომწერებს გაუმხილა, თუ როგორ უყვარდა ვუდი, ბაზი და ფილმის სხვა პერსონაჟები. 2020 წლის COVID-19-ის დროს, როდესაც გასართობი ინდუსტრიის დიდი ნაწილი გაჩერებული იყო, Bad Bunny გამომწერებს სახლიდან ართობდა. მან შექმნა „სათამაშოების ისტორიით“ შთაგონებული ვიდეოები, რისთვისაც სათამაშო ფიგურების საკუთარი კოლექცია გამოიყენა. სოციალურ ქსელებში გაზიარებულმა კლიპებმა, იუმორის გრძნობისა და კრეატიულობის წყალობით, სწრაფად მიიპყრო ყურადღება. მის მიერ შექმნილი იმპროვიზებული მინი-ფილმების ცენტრში, რომლებსაც მან „სათამაშოების ისტორია კორონავირუსის ეპოქაში“ უწოდა, ნაცნობი პერსონაჟები – ვუდი, ბაზ ლაითიერი, რექსი და ფორკი იყვნენ. ყველას თავად ბედ ბანი ახმოვანებდა.
ბოლო რამდენიმე წლის განმავლობაში, გრემის მფლობელმა არტისტმა სამსახიობო სფეროშოც შეაბიჯა: ის გამოჩნდა ადამ სენდლერთან ერთად ფილმში Happy Gilmore და მონაწილეობა მიიღო ოსტინ ბატლერთან ერთად ფილმში – Caught Stealing. Bad Bunny ასევე მთავარ როლს შეასრულებს ფილმში Porto Rico, რომელიც რენე პერეს ხოგლარის მომავალი პროექტია.
„სათამაშოების ისტორიის“ მომავალი ნაწილის შემოქმედებითი გუნდი კვლავ აერთიანებს ანიმაციის ძველ მსახიობებს, მათ შორის ტომ ჰენკსს ვუდის როლში, ტიმ ალენს ბაზ ლაითიერის როლში და ჯოან კიუსაკს ჯესის როლში. ანიმაციის ეს ნაწილი ფოკუსირებულია სათამაშოებზე, რომლებიც თანამედროვე ტექნოლოგიებს უპირისპირდებიან.
„სათამაშოების ისტორია 5“ 19 ივნისს გამოვა.
