დრეიკი ჩარტებში მორიგი შთამბეჭდავი კვირით ბრუნდება სამი ახალი ალბომის – ICEMAN-ის, HABIBTI-სა და MAID OF HONOUR-ის გამოსვლის შემდეგ.
სამივე პროექტმა, რომლებიც ერთდროულად 15 მაისს გამოვიდა, Billboard 200-ის პირველი სამი პოზიცია დაიკავა, რითაც დრეიკი გახდა პირველი არტისტი ჩარტის 70-წლიან ისტორიაში, რომელმაც ტოპ სამეული ერთდროულად დაიკავა.
ICEMAN 2026 წლის ალბომებში წამატებული კვირით მეორე ადგილზეა. მას მხოლოდ BTS-ის ARIRANG უსწრებს. ალბომი დრეიკისთვის Billboard 200-ის ლიდერი მე-15 ჩანაწერია, რითაც მან გადაუსწრო ჯეი-ზისა და ტელორ სვიფტს. რეპერი მხოლოდ The Beatles-ს ჩამორჩება, რომელსაც ჩარტში 19 ლიდერი ალბომი აქვს.
დრეიკის დომინაცია Billboard Hot 100-ზეც ვრცელდება, სადაც ამ კვირაში მისი ერთდროულად 42 სიმღერა შევიდა. ეს შედეგი ერთ კვირაში ერთდროულად ჩარტში მოხვედრილი ყველაზე მეტი სიმღერის ახალი რეკორდია. წინა რეკორდი – 37 სიმღერა – მორგან უოლენს ეკუთვნოდა, რომელმაც 2025 წელს თავისივე, 36 სიმღერის რეკორდი მოხსნა. ხოლო მანამდე, ხუთი წლის განმავლობაში, ამ რეკორდის მფლობელი ისევ დრეიკი იყო, როცა 2018 წლის 14 ივლისით დათარიღებულ ჩარტში მისი 27 სიმღერა შევიდა ალბომიდან Scorpion. Billboard Hot 100-ში ამ კვირას შესული დრეიკის 42 სიმღერიდან 40 დებიუტანტია.
საერთო ჯამში რეპერმა თავისი ყველა დროის რეკორდები კიდევ უფრო გაზარდა: 47 ჰიტი ტოპ ხუთეულში, 90 სიმღერა ტოპ ათეულში, 154 სიმღერა ტოპ ოცეულში, 241 კი – ტოპ ათეულში. მთლიანობაში, Hot 100-ის ჩარტში მას უკვე 402 სინგლი აქვს.
ამასთანავე, დრეიკი გახდა პირველი არტისტი Billboard Hot 100-ის 67-წლიან ისტორიაში, რომელმაც ჩარტში 400-სიმღერიან ნიშნულს მიაღწია. ის ასევე რჩება ერთადერთ მუსიკოსად, რომელიც კარიერის განმავლობაში 300-ზე მეტჯერ შევიდა ჩარტში. მეორე ადგილს, 276 შესვლით, ტეილორ სვიფტი იკავებს.
ამ მასშტაბური კვირის წყალობით, დრეიკი დაბრუნდა Billboard Artist 100-ის პირველ ადგილზეც, ჯამში 39-ე კვირით, რაც მეორე ყველაზე მაღალი მაჩვენებელია ჩარტის 12-წლიან ისტორიაში. ამ შემთხვევაში ლიდერობა 137 კვირით სვიფტს ეკუთვნის.
