5 ოქტომბრის გამხსნელი კონცერტის შემდეგ, რომლის ფარგლებშიც მსმენელის წინაშე ალექსანდრე კორსანტია და იუტონგ სუნი წარდგნენ, კონკურსის ყველაზე დაძაბული ნაწილი დაიწყო.
პირველ და მეორე ტურში ჟიურის წინაშე ყველა მონაწილე წარდგა. მათ შორის იყვნენ საქართველოს წარმომადგენლები ანა პაიჭაძე და საბა მიქელაძე. მეორე ტურში ყველა მონაწილემ სავალდებულო ნაწარმოების სახით კომპოზიტორ ნიკოლოზ ნამორაძის Wasserspiel („წყლის მუსიკა“) შეასრულა. აღსანიშნავია, რომ კომპოზიტორი თავადაა წლევანდელი ჟიურის წევრი.
მოულოდნელად, ხელის დაზიანების გამო, კონკურსს გამოეთიშა გერმანიის წარმომადგენელი სერგეი ბელიავსკი, რომელიც ლიდერთა შორის იყო. ნახევარფინალში ჯამში 10 კონკურსანტი მოხვდა, მათ შორის ანა პაიჭაძე.
ნახევარფინალის შედეგები 12 ოქტომბერს, საღამოს მოსმენის შემდეგ გამოცხადდა. სცენაზე კონკურსის სამხატვრო ხელმძღვანელ ალექსანდრე კორსანტიასთან ერთად საერთაშორისო ჟიურის სრული შემადგენლობა გამოვიდა, ხოლო ჟიურის თავმჯდომარე იოჰევედ კაპლინსკიმ შედეგები გამოაცხადა.
ფინალში გადასული ექვსი კოკნურსანტი მსმენელისა და ჟიურის წინაშე 14 და 15 ოქტომბერს წარდგება. სოლისტები საფორტეპიანო კონცერტებს ევგენი მიქელაძის სახელობის ეროვნულ სიმფონიურ ორკსეტრთან ერთად დაუკრავენ, რომელსაც მაესტრო პაველ პრჟიტოცკი უდირიჟორებს.
კონკურსი 16 ოქტომბერს დასრულდება. დახურვის ცერემონიაზე გამოცხადდება მთავარი და სპეციალური პრემიების მფლობელთა ვინაობა. კონკურსი საზეიმო ცერემონიითა და ლაურეატთა გალაკონცერტით დასრულდება.
პიანისტთა თბილისის მე-8 საერთაშორისო საფორტეპიანო კონკურსი მის დამფუძნებელს, გამოჩენილ ქართველ პიანისტსა და პედაგოგს, პროფესორ მანანა დოიჯაშვილს მიეძღვნა.
მანანა დოიჯაშვილის ინიციატივით 1997 წელს დაარსებული კონკურსი ახალგაზრდა პიანისტებისთვის მნიშვნელოვან საერთაშორისო პლატფორმას წარმოადგენს. ის ხელს უწყობს ნიჭიერი მუსიკოსების პროფესიულ განვითარებას, მათი შემოქმედებითი პოტენციალის წარმოჩენასა და საერთაშორისო მუსიკალურ სივრცეში ინტეგრაციას. კონკურსი „საქართველოს მუსიკალური კონკურსების ფონდის” ორგანიზებით ოთხ წელიწადში ერთხელ იმართება.
