ცნობილი ამერიკელი რეპერი და პოპ პანკ შემსრულებელი Machine Gun Kelly ჟურნალ “ბილბორდის” 26 მარტის ნომრის სტუმარია. ინტერვიუსთან ერთად გამოცემის გვერდებზე მისი ფოტოსურათებიც დაიბეჭდება, რომლებზეც ვიჯატ მოჰინდრამ იმუშავა. ფოტოსესია კალიფორნიაში, ლოს ანჯელესის მახლობლად, Pink Palace-ში შედგა, რომელიც 1968 წელსაა აშენებული.
კოლსონ ბეიკერი, ფსევდონიმით Machine Gun Kelly, შტატ ოჰაიოს ქალაქ კლივლენდში მცხოვრები რეპერი. მომღერალი და მსახიობია. არტისტი ფართო საზოგადოებამ 2010 წელს გაიცნო, როდესაც საკუთარი სახსრებით მიქსტეიპი Lace Up გამოუშვა. ორი წლის შემდეგ გაყიდვაში ამავე სახელწოდების ალბომი ჩაეშვა, რომელმაც Billboard 200-ის ჩარტში მეოთხე ადგილი დაიმსახურა. ქელის მოღვაწეობის განმავლობაში 5 სტუდიური ალბომი აქვს გამოცემული. პირველი ოთხი ჰიპ ჰოპ ნამუშევარია, მეხუთე Tickets to My Downfall კი პოპ პანკი, რომელზეც ცნობილ დრამერ ტრევის ბარკერთან ერთად იმუშავა და Billboard 200-ში პირველი ადგილიც მოიპოვა.
არტისტის კარიერის ყველაზე გახმაურებული მომენტი ეპოქალურ კოლეგასთან, ემინემთან დაპირისპირებას უკავშირდება. ამ უკანასკნელმა თავის 2018 წლის ტრეკში Not Alike მეშინ გან ქელის საკუთარ შვილზე, ჰეილიზე საუბარი აუკრძალა. 2012 წელს ქელიმ გოგონას “ძალიან სექსუალური” (Hot as fu*k) უწოდა, რამაც, როგორც ჩანს, რეპერი გაანაწყენა. კოლსონი ემინემს დის-კომპოზიციით Rap Devil გამოეხმაურა, პასუხად კი ჰიტი Killshot მიიღო.
