მუსიკოსი ჯონ ბატისტი თეთრ სახლში, ჯო ბაიდენის პირველ სახელმწიფო ვახშამზე იმღერებს. მიღება, რომელიც ხუთშაბათს არის დაგეგმილი, საფრანგეთის პრეზიდენტ მაკრონის პატივსაცემად იმართება. ვახშამი შეერთებულ შტატებსა და საფრანგეთს შორის მეგობრობას ეძღვნება.
„არტისტი, რომელიც სცდება თაობების საზღვრებს. ჯონ ბატისტის მუსიკა ადამიანებს შთააგონებს და აერთიანებს. მოხარული ვართ, რომ სწორედ ის წარდგება თეთრ სახლში ჯო ბაიდენის პირველ სახელმწიფო ვახშამზე“ – განაცხადა შეერთებული შტატების პირველი ლედის – ჯილ ბაიდენის პრეს სპიკერმა, ვანესა ვალდივიამ, რომელიც ღონისძიების ორგანიზების დეტალებს მეთვალყურეობს.
ფორმალური შეხვედრა შესაბამისი ეტიკეტის დაცვით წარიმართება. ეს კიდევ ერთი ღონისძიება იქნება, რომელიც წელს თეთრი სახლის საკმაოდ დატვირთულ სეზონზე ჩატარდება. ნოემბრის დასაწყისში, თეთრ სახლში ბაიდენის შვილთაშვილის, ნაომის საქორწილო ცერემონია გაიმართა. რამდენიმე დღის წინ კი, ჯილ ბაიდენმა საპრეზიდენტო რეზიდენციის სადღესასწაულო დეკორაცია წარადგინა.
ჯონ ბატისტმა წელს ხუთი გრემი მიიღო, მათ შორის ნომინაციაში – „წლის ალბომი“. არტისტი აღნიშნულ ნომინაციაში დაჯილდოვდა ალბომისათვის – We Are. 36 წლის ჯონ ბატისტი დიდი ხნის განმავლობაში სატელევიზიო პროექტის, The Late Show with Stephen Colbert-ის მუსიკალური ხელმძღვანელი და ბენდის ლიდერი იყო. შოუ მან რამდენიმე თვის წინ, შვიდ წლიანი მოღვაწეობის შემდეგ დატოვა.
ჯონ ბატისტი Pixar-ის ცნობილი ანიმაციური ფილმის Soul-ის კომპოზიტორი და არანჟირების ავტორია. ანიმაციის მუსიკალურ გაფორმებაზე მან Nine Inch Nails-ის ტრენტ რეზნორთან და ატიკუს როსთან ერთად იმუშავა, რისთვისაც არტისტებმა ოქროს გლობუსიც მოიპოვეს ნომინაციაში „საუკეთესო მუსიკალური გაფორმება“. ტრიომ ამერიკის კინოაკადემიის უმაღლესი ჯილდოც მიიღო. ამავე ნამუშევრისათვის მუსიკოსებმა ასევე დაიმსახურეს „გრემი“.
თეთრი სახლის სახელმწიფო ვახშამზე ბატისტის მონაწილეობის შესახებ ინფორმაცია, პირველმა The Washington Post-მა გაავრცელა.
