4 დეკემბერს, 2022 წლის „კენედის ცენტრის პრემიის“ ცერემონია გაიმართა. ღონისძიების გამართვიდან დაახლოებით ერთი თვის შემდეგ, დაჯილდოების ორგანიზატორებმა ცერემონიიდან რამდენიმე ვიდეო გაავრცელეს. გამოქვეყნებული მასალიდან განსაკუთრებული ყურადღება საშა ბარონ კოენის გამოსვლამ მიიპყრო. მსახიობმა ჯგუფ U2-ს საპატიო პრემია გადასცა. საშა ბარონ კოენის სიტყვით გამოსვლა ტრადიციულად გამორჩეული აღმოჩნდა. მსახიობი სცენაზე თავისი ცნობილი პერსონაჟის, ბორატის იმიჯით წარდგა. საჯარო სიტყვისას, კოენმა კანიე უესტი და დონალდ ტრამპი ჩვეული სარკაზმით გააკრიტიკა. საშა ბარონ კოენის გამოსვლისას კამერამ დარბაზში მყოფი ჯო ბაიდენი სიცილისას არაერთხელ დააფიქსირა.
საშა Ბარონ კოენი სარკაზმით გამოეხმაურა კანიე უესტის ანტისემიტურ განცხადებებს. აღსანიშნავია, რომ რამდენიმე თვის წინ, უესტი სოციალური ქსელებში სწორედ ანტისემიტური შინაარსის პოსტების გამო დაიბლოკა. სიძულვილის ენის შემცველი განცხადებების შემდეგ, უესტს კომპანიებმა კონტრაქტები გაუწყვიტეს. ამან ვარსკვლავს დიდი ფინანსური ზარალი მიაყენა და კანიე უესტმა მილიარდერის სტატუსი დაკარგა.
„თქვენმა კანიემ ყაზახეთში გადმოსვლა სცადა. მან სახელიც კი შეიცვალა და Kazakhstan-ye უესტი დაირქვა. თუმცა მიღებაზე უარი ვუთხარით, Ის ჩვენთვისაც კი ზედმეტად ანტისემიტისტია” – თქვა ყაზახელი ჟურნალისტის პერსონაჟად გარდასახულმა საშა ბარონ კოენმა.
საშა ბარონ კოენის ხუმრობის ადრესატი თავად U2-ც აღმოჩნდა. სიტყვით გამოსვლისას, კოენმა ბენდისა და Apple-ის უწინდელი თანამშრომლობა გაიხსენა. ამ თანამშრომლობის ფარგლებში, U2-ს 2014 წლის ალბომი – Songs of Innocence ავტომატურად იტვირთებოდა iTunes-ის მომხმარებელთა პირად მოწყობილობებში. აღნიშნულმა ფაქტმა არაერთი ადამიანის უკმაყოფილება გამოიწვია. ამ ამბის გახსენებისას, ბორატის პერსონაჟმა ბენდის რამდენიმე ჰიტის თავისებური ქავერიც შეასრულა.
ნახეთ საშა ბარონ კოენის გამოსვლა „კენედის ცენტრის პრემიის“ ცერემონიაზე:
