სტატიის ბოლოს, თანდართულია მერლინ მენსონის ადვოკატის, ჰორვარდ კინგის განცხადება, რომელიც ინფორმაციის გამოქვეყნების შემდეგ მან Billboard-ს გამოუგზავნა.
მერლინ მენსონს სექსუალურ ძალადობაში ბრალი ედება. პირმა რომელმაც ანონიმურად არჩია ყოფნა, სახელით „ჯეინ დოე“ ამტკიცებს, რომ მომღერალმა კარიერის დასაწყისში არასრულწლოვან გოგონაზე სექსუალურად იძალადა.
მერლინ მენსონზე – იგივე ბრაინ უორნერზე საჩივარი ნასაუს ოლქის უზენაეს სასამართლოში შევიდა, რომელიც სექსუალურ ბრალდებას, ემოციური და მორალური სტრესის განზრახ მიყენებას გულისხმობს.
სარჩელში ნათქვამია, რომ იმ პერიოდში გოგონა თექვსმეტი წლის იყო. მომღერალს იგი 1995 წელს დალასის შოუს შემდეგ შეხვდა, რა დროსაც მენსონმა ის და თანმხლები გოგონა ტურნესთვის განკუთვნილ ავტობუსში მიიწვია.
მერლინ მენსონის პრეს სპიკერმა „ჯეინ დოეს“ სარჩელზე კითხვას არ უპასუხა.მენსონის ადვოკატმა ჰოვარდ კინგმა კი განცხადება გამოაგზავნა, რომელსაც ბილბორდი სტატიის ბოლოს გთავაზობთ.
სარჩელში მერლინ მენსონის დამცინავი და ცინიკური მიდგომაცაა აღწერილია, სექსუალური აქტის დასრულების შემდეგ მენსონი მოსარჩელეს დაემუქრა, რომ თუ ვინმეს ამ ამბის შესახებ გაიგებდა მოკლავდა მასაც და მის ოჯახის წევრებსაც.
მერლინ მენსონი სექსუალურ, ემოციურ და ფიზიკურ შეურაცხყოფაში ათზე მეტმა ქალმა დაადანაშაულა. მათ შორის არის მსახიობი ევან რეიჩელ ვუდი, რომელიც HBO-ს დოკუმენტური ფილმის Phoenix Rising-ის მონაწილეა.
მენსონის ერთ-ერთი ბრალმდებელი მსახიობი ესმე ბიანკოც იყო. მან სექსუალური ძალადობის სარჩელის შეწყვეტას ხელი მოაწერა. ცოტა ხნის წინ კი, მოსამართლემ მოდელ ეშლი მორგან სმიტლაინის კიდევ ერთი სარჩელი სექსუალური ძალადობის შესახებ არ დააკმაყოფილა. გასულ წელს, მაისში, ლოს-ანჯელესის უმაღლესი სასამართლოს მოსამართლემ, მენსონის ყოფილი პირადი ასისტენტის სარჩელი, სექსუალური ძალადობის და განზრახ ემოციური სტრესის მიყენების ბრალდებით ასევე არ დააკმაყოფილა. მენსონმა ყველა ბრალდება უარყო.
„ჯეინ დოეს“ სარჩელში ნათქვამია, რომ მერლინ მენსონი ინციდენტის შემდეგ მოზარდს ინტერნეტით ხშირად ურეკავდა, ესაუბრებოდა და ფოტოების გაგზავნას სთხოვდა. იმავე წელს, მოსარჩელეს მტკიცებით ისინი ნიუ ორლეანში შეხვდნენ, რა დროსაც მუსიკოსმა მასზე სექსუალურად კვლავ იძალადა. „ჯეინ დოეს“ თქმით თვრამეტი წლის ასაკში, 1999 წელს ის მერლინ მენსონის შოუს ნიუ ორლეანში დაესწრო, იგი მუსიკოსს ტურნეში გაჰყვა და ამ ხნის განმავლობაში მენსონი ხშირად სთავაზობდა ნარკოტიკებს და სექსუალურად ავიწროებდა.
ნახეთ მენსონის ადვოკატის ჰოვარდ კინგის განცხადება ბრალდებების საპასუხოდ: „ბრაიან უორნერი ამ პიროვნებას არ იცნობს და არ ახსოვს, თუ ოდესმე ამ ოცდარვა წლის განმავლობაში შეხვედრია. გამომდინარე აქედან ბუნებრივია, არასდროს ჰქონია მასთან ინტიმური ურთიერთობა. მოსარჩელე ორ წელზე მეტია თავის შეთხზულ ზღაპრებს პოდკასტებში და ახალ ამბებში ავრცელებს. თუმცა ყველაზე მინიმალური დაკვირვებაც კი ცხადყოფს, რომ იგი მუდმივად ცვლის ისტორიებს და ეს ისტორიები ერთმანეთში აშკარად შეუსაბამოა. თუ ვინმე შეადარებს მის ახალ საჩივარს, წინა ინტერვიუების
შინაარს, ნათლად დაინახავს მანკიერ სიცრუეს და შეუსაბამო ინფორმაციას. ცხადია ბრაიანი არ ადასტურებს ამ ფაქტებს და სასამართლოც არ დაადასტურებს.“
