„ქოლგა თბილისი ფოტო 2023″ -ის ფარგლებში ფოტოგრაფ დავით სულაქველიძის გამოფენა, სახელწოდებით „როგორ დავიმახსოვროთ 80-იანები“ გაიხსნა.
ფოტოგამოფენა საქართველოს 80-იანი წლების ისტორიას ასახავს, ფოტოები დამთვალიერებელს იმ პერიოდის შესახებ უყვება, როცა საბჭოთა კავშირი იშლებოდა. ფოტოსერიის ავტორი დავით სულაქველიძე სხვადასხვა სფეროში მოღვაწეობდა – ის იყო მუსიკოსი, მათემატიკოსი, ფოტოგრაფი და შემდეგ საქართველოში ერთ-ერთი პიონერი გრაფიკული დიზაინერი. აღსანიშნავია, რომ ეს სერია აერთიანებს მუსიკალური ფოტოგრაფიის ნაწილსაც. დავით სულაქველიძე თავად იყო იმ მოვლენების უშუალო მონაწილე, რომელსაც ასახავდა. როგორც გამოფენის ორგანიზატორები აღნიშნავენ, „ფოტოები კარგად აჩვენებს მისწრაფებას თავისუფლებისკენ, იმ მნიშვნელოვან ტენდენციებს, რაც უშუალოდ საქართველოს დამოუკიდებლობის მოპოვებამდე გამოვლინდა საზოგადოებაში.“
როგორც გამოფენის კურატორი გურამ წიბახაშვილი Billboard საქართველოსთან საუბრისას აღნიშნავს, დავით სულაქველიძის პროფესიებმა და მისმა მრავალფეროვანმა ინტერესებმა ფოტოარქივი უნიკალურ მემკვიდრეობად აქცია.
გურამ წიბახაშვილი, ფოტოგრაფი:
„დავით სულაქველიძე იყო როკ მუსიკოსი, მათემატიკოსი, მისი საქმიანობა და ინტერესი დაკავშირებული ისეთ სხვადასხვა სფეროსთან როგორებიც არის სპორტი, კინო, გრაფიკული დიზაინი და მისი ეს მრავალმხრივი მოღვაწეობა გამოფენაზეც აისახება. სამწუხაროდ დავით სულაქველიძე ორი წლის წინ გარდაიცვალა. მისი ნეგატივები ახლახან ნიკა დუმბაძემ აღმოაჩინა და გადავწყვიტეთ, რომ ეს ნამუშევრები აუცილებლად უნდა გამოფენილიყო. აქ წარმოდგენილი ფოტოები 1982 წლიდან 1989 წლამდეა გადაღებული და არქივის მხოლოდ ნაწილია.“
ექსპოზიციას 20 ივნისის ჩათვლით „თიბისი კონცეპტის“ მულტიფუნქციური სივრცე მასპინძლობს. გამოფენის შესახებ მეტი დეტალისათვის ეწვიეთ ბმულს.
