კანიე უესტის ორი კონცერტი, რომელიც ოქტომბერში რუსეთში იყო დაგეგმილი, გავრცელებული ინფორმაციით, საკონცერტო სივრცის მხრიდან გაუქმდა. სანქტ-პეტერბურგის „გაზპრომ არენამ” 24 აგვისტოს სოციალურ ქსელში განცხადება გაავრცელა, სადაც აღნიშნა, რომ 80 000-ადგილიან სტადიონს იჯარასთან დაკავშირებით არანაირი ხელშეკრულება არ გაუფორმებია.
„ასეთი შეთანხმება არ არსებობს,” – ვკითხულობთ პოსტში. „შესაბამისად, კონცერტები ჩვენს სივრცეში ვერ გაიმართება.” თუმცა მას შემდეგ, რაც კონცერტების შესახებ თავდაპირველი ინფორმაცია გავრცელდა, „გაზპრომ არენას” პოზიცია განსხვავებული ჩანდა. ის სოციალურ ქსელებში აქტიურად აანონსებდა უესტის მასპინძლობას და ღონისძიებას პოპულარიზაციას უწევდა.
„ბი-ბი-სის” ცნობით, რუსეთის კონცერტები 10 და 11 ოქტომბერს იყო დაგეგმილი და ახლა პრომოუტერები ღონისძიებისთვის ახალი ადგილის მოძიებას ცდილობენ.
„ამის შესახებ ჩვენც თქვენთან ერთად, მედიიდან გავიგეთ,” – დაწერა კონცერტის ერთ-ერთმა პრომოუტერმა, „ამ დროისთვის კანიეს კონცერტი გაუქმებული არ არის. ჩვენ ვდილობთ, დავუკავშირდეთ არენის წარმომადგენლებს, გავარკვიოთ ამ განცხადების გამოქვეყნების მიზეზი და საკითხი მოვაგვაროთ. სიახლეებს შეგატყობინებთ.”
„გაზპრომ არენაზე” გამოსვლით, უესტი პირველი რეპერი სუპერვარსკვლავი გახდებოდა, რომელიც რუსეთის უკრაინაში შეჭრის შემდეგ იქ კონცერტს გამართავდა. უკრაინის ინსტიტუტმა მოკავშირეებს მოუწოდა, შეაჩერონ რუსეთთან კულტურული თანამშრომლობა.
საჯაროობის კუთხით, 2026 წელს კანიე ძირითადად ჩრდილში იყო და მსოფლიოს სხვადასხვა კუთხეში ცალკეულ კონცერტებს მართავდა. მას უკვე ჰქონდა გამოსვლები თურქეთში, ნიდერლანდებში, საქართველოში, ალბანეთში, პორტუგალიაში, ესპანეთსა და ყაზახეთში.
გრემის მფლობელი რეპერი აშშ-ში აპრილში დაბრუნდა და ლოს-ანჯელესში ორი კონცერტი გამართა. ასევე გულშემატკივრის წინაშე წარდგა ტამპა ბეისა და სან-ანტონიოში. 28 აგვისტოს უესტი ახალ ორლეანში გამოვა, შემდეგ კი მშობლიურ ჩიკაგოში ორ კონცერტს გამართავს.
უესტი დღემდე განიცდის იმ უარყოფითი ტალღის შედეგს, რომელიც 2022 წელს, მისი ანტისემიტური განცხადებებისა და ნაცისტური სიმბოლიკის გამოყენების შემდეგ დაიწყო. წელს მას კონცერტები გაუუქმეს საფრანგეთში, პოლონეთსა და ჩეხეთში, ასევე გამოსვლა ლონდონის Wireless Festival-ზე. იტალიასა და ინდოეთში დაგეგმილი კონცერტების გაუქმების მიზეზად კი უსაფრთხოების საკითხები დასახელდა.
რაც შეეხება მუსიკალურ მხარეს, მარტში კანიემ ალბომი Bully გამოსცა, რომელიც Billboard 200-ის მეორე ადგილზე გავიდა.
