ფეხბურთის ყველაზე გამორჩეული ტურნირის ფინალური მატჩიდან ერთ თვეზე მეტი გავიდა, თუმცა შაკირასა და Burna Boy-ს Dai Dai კვლავ განაგრძობს მუსიკალურ ჩარტებში დომინირებას. სიმღერა უკვე მეექვსე კვირაა, Billboard Global 200-ის, ხოლო მეცხრე კვირაა, Billboard Global Excl. U.S.-ის პირველ ადგილს იკავებს.
Dai Dai-მ, რომელმაც Global 200-ის ლიდერობა პირველად ივლისის შუა რიცხვებში მოიპოვა, 14-20 აგვისტოს პერიოდში მსოფლიოს მასშტაბით 40.3 მილიონი სტრიმი და 5 000 გაყიდვა დააგროვა. Global Excl. U.S. ჩარტში კი, აშშ-ის ფარგლებს გარეთ – 34.4 მილიონი სტრიმი და 3 000 გაყიდვა. წინა კვირასთან შედარებით ეს მაჩვენებლები დაბალია, თუმცა სიმღერა მაინც ახერხებს ჩარტებში პირველი პოზიციის შენარჩუნებას.
Global 200-ის მეორე ადგილს ელა ლენგლის Choosin’ Texas იკავებს. შემდეგ მოდის Tame Impala-ს Loser, არიანა გრანდეს Hate That I Made You Love Me და ჯასტინ ბიბერის Beauty and a Beat.
რაც შეეხება Global Excl. U.S.-ის ტოპ ხუთეულს, მეორე ადგილს სტაბილურად ინარჩუნებს Hate That I Made You Love Me, შემდეგ მოდის Loser და Beauty and a Beat. მეხუთე პოზიციას კი BTS-ის Swim იკავებს.
ჩარტის ტოპ ათეულში ასევე პირველად შევიდა HUGEL-ის, Imael Angel-ისა და Ultra Naté-ის Movin’ to the Sun, რომელიც 16 მილიონი სტრიმით ამჟამად მეცხრე ადგილზეა.
Billboard Global 200 და Global Excl. U.S. ჩარტები სიმღერებს აფასებს მსოფლიოს 200-ზე მეტი ტერიტორიიდან მიღებული სტრიმინგისა და გაყიდვების მონაცემების მიხედვით, რომელსაც Luminate აგროვებს.
Global 200 მოიცავს მონაცემებს მთელი მსოფლიოდან, ხოლო Global Excl. U.S. ჩარტი იმ ტერიტორიების მონაცემებს ითვალისწინებს, რომლებიც აშშ-ის ფარგლებს გარეთ მდებარეობს.
