28 მაისს, Elektrowerk-ში Tbilisi Newcomers 2023-ის ფინალური ლაივ შოუ გაიმართა.
Newcomers 2023-ის დასკვნითი ეტაპზე რვა ბენდი და ერთი მომღერალი წარდგა. ესენი არიან: დათო ჯიქიძე, ვია 19, Stuttter, SALLO, Lucaroi, Skyress, Will Kolak, Anuka in Anmanland და Cinema Cinema. ფინალურ ეტაპზე გარკვეული მიზეზების გამო მეტალ ჯგუფი Enforcement ვერ გამოვიდა.
Newcomers 2023-ის გამარჯვებული ჯგუფი Will Kolak – Tbilisi Open Air-ის მთავარ სცენას დაიკავებს. Zinger Stage-ზე კი სამი ბენდი: Stuttter, Lucaroi და Anuka in Anmanland წარდგება.
ღონისძიებაზე Newcomers-ის ჟიურის წევრების, სანდრო სულაქველიძის (სულიკა), აჩიკო გულედანის, ვახო ბაბუნაშვილის, ბექა ჯაფარიძის და დათო ცინცაძის გადაწყვეტილებით Zinger Stage-ზე ორი ბენდის ნაცვლად სამი გამარჯვებული დასახელდა.
„ეს არის New Comers 2023. დღეს უნდა დაეკრა 10 საუკეთესო New Comers, რომლებიც ავარჩიეთ, მაგრამ ერთი დღეს ავადმყოფობის გამო ვერ იქნება, ამიტომ ცხრა ბენდს მოვუსმენთ. წელს ვარჩევთ ერთ New Comers რომელიც დაუკრავს Tbilisi Open Air-ის მთავარ სცენაზე და პლუს ორ New Comers, რომელიც Zinger Stage-ზე დაუკრავს. მგონია რომ New Comers- ძალიან კარგი საშუალებაა არტისტისთვის, იმისათვის, რომ გააცნონ თავისი თავი უფრო დიდ აუდიტორიას, ჰქონდეთ შანსი რომ მოხვდნენ Open Air-ის მთავარ სცენაზე, იმიტომ რომ იქ ათობით ათასი ადამიანი უსმენს უკვე მათ მუსიკას. ყოველ წელს საკმაოდ საინტერესო განაცხადები შემოდის და წელს კლასის მხრივ დაკვრის, შესრულების, პერფორმანსის მხრივ ძალიან მაღლა არის აწეული თამასა. გადაწყვეტილების მიღებისას მაქსიმალურად ვეცადეთ ყველა ჟანრი მოგვეცვა, ძალიან განსხვავებული და ეკლექტური კონცერტი იქნება და ასარჩევად ძალიან საინტერესო.“ – სულიკა – Tbilisi Open Air-ის ტექნიკური მენეჯერი და New Comers-ის ჟიურის წევრი.
„პირველ რიგში დიდი მადლობა მინდა გადავუხადო AlterVision ჯგუფის თითოეულ წევრს, ეს ყველაფერი გამოჩენისთანავე მუსიკოსებისთვის ძალიან დიდი მოტივაციის მომცემი გახდა და თანამედროვე მუსიკის განვითარებისთვის ერთ-ერთ მთავარ ლოკომოტივად იქცა. ჩვენთვის ძალიან დიდი პატივია მათთან მუშაობა. რაც შეეხება დანარჩენ ბენდებს მინდა რომ ყველას წარმატება ვუსურვო, იმიტომ რომ წლევანდელი წელი დამუხტული იყო ბევრი ენერგიით და კარგი ვაიბით. დიდი მადლობა ყველას ძალიან გამიხარდა თქვენთან სცენის გაზიარება.“ – Will Kolak-ის ვოკალისტი, თორნიკე ცორიკიშვილი.
Newcomers 2023-ზე ბენდი Stuttter – TOA 2023-ის პირველ დღეს მსმენელის წინაშე Zinger Stage-ზე წარდგება.
„პირველად გამოვდივართ ასეთ მასშტაბურ კონცერტზე, აქამდე უფრო ანდერგრაუნდ სივრცეებში ვუკრავდით. ვცდილობთ ყოველთვის კარგ ადგილებში დავუკრათ, მაგრამ სამწუხაროდ საქართველოში არ არის ამდენი გასაქანი.“ – Stutter-ის გიტარისტი, დაჩი მდივნიშვილი.
„ჩვენი ბენდი ორი წელია რაც არსებობს და მაგარი ორი წელი იყო. ბენდის გაქაჩვა რთულია საქართველოში, მაგრამ New Comers იმის საშუალებას გვაძლევს რომ გავქაჩოთ. ყველანაირად გვეხმარებიან და ეს მახარებს“. – Stutter-ის დრამერი და ვოკალისტი, ანდრია ბერიშვილი.
„ჩვენ ვართ Cinema Cinema, შევიქმენით 2023 წლის იანვარში. ჩვენი სიმღერები ინდი როკსა და ინდი პოპს შორის ნაზავს მოიცავს. სიმღერებს ისეთ თემებზე ვწერთ ძირითადად, რაც თინეიჯერულ ასაკში ადამიანს შეიძლება აწუხებდეს ან უხაროდეს. გვინდა, რომ საცეკვაო და კარგი სიმღერები გამოვიდეს. New Comers-ის გამარჯვებულები არიან Bedford Falls, Killages, LUA, 4D Monster Lobsters და ყველა ძალიან პატივსაცემი ბენდია. შესაბამისად დიდი შესაძლებლობაა New Comers- არტისტისთვის.“ – Cinema Cinema-ს გიტარისტი, პროდიუსერი და სიმღერების ავტორი, ანდრია ხვიჩია.
„მე ვარ ანამარია, მაქვს ცალკე პროექტი Anmanland ჩემი სხვადასხვა მულტიმედია არტის სფეროში და მქონდა მუსიკალური კოლაბორაცია Sadboi in Anmanland. რამდენიმე სიმღერა გვაქვს გაკეთებული ერთად და ერთ-ერთი სიმღერა, რომელიც ბენდისთვის გადავაკეთეთ დღეს შესრულდა. ასევე მუსიკოს Anuka-ს სიმღერებიც არის და რახან გავერთიანდით დავირქვით Anuka in Anmanland. NewComers რაც შეეხება ძალიან დიდი მნიშვნელობა აქვს ისეთ პატარა მუსიკალურ ინდუსტრიაში, როგორიც საქართველოშია. ყველა არტისტს აქვს შესაძლებლობა შეიტანოს განაცხადი და წარადგინოს თავი და არ გჭირდება დიდი ჯგუფი ან პიარი რაც კარგია. ჩვენს ქვეყანაში ყველაზე კარგ სცენაზე საშუალება გეძლევა დიდი აუდიტორიის წინაშე წარდგე.“ – ანამარია ბურდული – Anmanland.
გამარჯვებული ბენდები: Will Kolak, Stuttter, Anuka in Anmanland და Lucaroi Tbilisi Open Air-ის მთავარ და Zinger სცენაზე გამოვლენ, რომელიც Lisi Wonderlend-ში 23-25 ივნისს გაიმართება.
