მალე მაყურებელი ცნობილ ყოფილ ფეხბურთელზე, დევიდ ბექჰემზე გადაღებულ დოკუმენტურ სერიალს იხილავს. Beckham – ასე ჰქვია ოთხნაწილიან დოკუმენტურ ნამუშევარს, რომლის ტრეილერიც Netflix-მა ახლახან გამოაქვეყნა.
ტრეილერი ბექჰემის კარიერის ადრეული წლების კადრებით იწყება. ეს არის სერიალი, რომელიც მაყურებელს უყვება ისტორიას, თუ როგორ იქცა დევიდ ბექჰემი მსოფლიო ფენომენად. ტრეილერში ასევე ვხედავთ დევიდ ბექჰემის ბავშვობის ამსახველ საარქივო კადრებს, სადაც ის ბურთით და ფეხბურთელის ფორმით არის აღბეჭდილი. „სკოლაში კარგად არასდროს მისწავლია“ – ისმის ბექჰემის ხმა კადრების ფონზე.
ვიდეოს 22-ე წამზე ვიქტორია ბექჰემი ჩნდება. სწორედ ამ ტრეილერიდან ირკვევა, რომ ვიქტორიას მენეჯერს სურდა, ფეხბურთელთან ურთიერთობა მომღერალს საიდუმლოდ შეენახა. „ჩვენ მანქანის სადგომებზე ვხვდებოდით“ – აღნიშნავს ვიქტორია. სერიალის პრემიერა 4 ოქტომბერს შედგება. დოკუმენტური ნამუშევარი ოსკაროსანმა ფიშერ სტივენსმა გადაიღო.
წყვილმა ურთიერთობა 1997 წელს დაიწყო და შემდეგ წელს დაინიშნნენ. 1999 წლის მარტში, ქორწილამდე ოთხი თვით ადრე, მათ პირველი შვილი, ბრუკლინი შეეძინათ. როგორც დევიდ ბექჰემი აღნიშნავს, რაც მოდის და სპორტის სამყაროს ყველაზე ცნობილი წყვილი გახდნენ, მისი ცხოვრება შეიცვალა და ამ პოპულარობამ საფეხბურთო კარიერაც კი დაჩრდილა.
„ვღელავდით, რომ ის [დევიდ ბექჰემი] დაკარგავდა ყველაფერს, რისთვისაც მთელი ცხოვრება შრომობდა“ – ამბობს ფეხბურთელის დედა, სანდრა უესტი ინტერვიუში. დევიდ ბექჰემის თქმით, ზეწოლა იმდენად დიდი იყო, რომ მას გარკვეული პერიოდი არ ეძინა და არ ჭამდა. ვითარება განსაკუთრებით დამძიმდა მაშინ, როცა Manchester United-ის მწვრთნელმა, ალექს ფერგიუსონმა 2003 წელს, Arsenal-თან წაგებული მატჩის შემდეგ, დევიდს ჩექმა ესროლა.
„საცირკო სანახაობა იქამდეა გასართობი, სანამ იქ თავად აღმოჩნდები“ – ამბობს ვიქტორია საარქივო ჩანაწერის ფონზე. ამ კადრებში ოჯახი გზას ფანების გარემოცვაში იკვლევს. სერიალის შემქმნელები მაყურებელს აქამდე უცნობი საარქივო მასალის ჩვენებას ჰპირდებიან. დოკუმენტური სერიალი ფეხბურთელის ოჯახის წევრებთან, მეგობრებთან და სპორტული სამყაროს წარმომადგენლებთან ინტერვიუებსაც აერთიანებს.
ნახეთ Beckham-ის ტრეილერი:
