ფესტივალ Astroworld-ზე მომხდარი შემთხვევის გამო, ტრევის სკოტი დაკითხეს. დაკითხვა რამდენიმე საათს გაგრძელდა. საქმე ეხება 2021 წელს ფესტივალზე, მისი გამოსვლის დროს მომხდარ ჭყლეტას, რის დროსაც რამდენიმე ადამიანი გარდაიცვალა და არაერთი დაშავდა. ამის შედეგად ტრევის სკოტის წინააღმდეგ სარჩელები მომზადდა.
სარჩელი სამოქალაქო დავის სტატუსით განიხილება, სკოტი პროცედურული წესების დაცვით დაიკითხა. როგორც ჰიუსტონის დეპარტამენტის სპიკერმა განაცხადა, ტრევისი სამართალდამცავ ორგანოებთან თანამშრომლობს.
ფესტივალის შემდგომ დაწყებულმა გამოძიებამ ტრევის სკოტის სისხლის სამართლებრივი პასუხისმგებლობა გამორიცხა მას შემდეგ, რაც სასამართლომ საქმეში დანაშაულებრივი ნიშნების არსებობა უარყო.
სასამართლო ჩანაწერების მიხედვით, ტრევის სკოტი მომხდარი ტრაგედიიდან ორ დღეში გამოიკითხა. მუსიკოსმა გამომძიებლებს განუცხადა, რომ დაინახა ადამიანი, რომელიც სცენასთან ახლოს სამედიცინო დახმარებას იღებდა. მიუხედავად ამისა, აუდიტორია ერთობოდა და შოუს გაჩერების საფუძველი ვერ შენიშნა.
ამჯერად ტრევის სკოტი მომჩივანი მხარეების ადვოკატებმა დაკითხეს. რაც შეეხება გარდაცვლილებს, მათგან ყველაზე პატარა 9 წლის იყო, ხოლო ყველაზე უფროსი – 27-ის. ისინი ჭყლეტის შედეგად გამოწვეული ასფიქსიით დაიღუპნენ.
საქმის პირველი სასამართლო განხილვა 2024 წლის 6 მაისს არის ჩანიშნული. სასამართლოს ანგარიშით, ამ ეტაპზე 1500 აქტიური სარჩელია. მათი უმეტესობა ტრევის სკოტის და Astroworld-ის ორგანიზატორი კომპანიის – Live Nation-ის წინააღმდეგ არის მომზადებული.
992 საქმე ფიზიკურ დაზიანებას შეეხება, 313 კი – ემოციურ და მენტალურ ტრავმას. დანარჩენ სარჩელებში საქმე ეხება ქირურგიული ოპერაციას, რომელთა საჭიროება, მოსარჩელის მტკიცებით, სწორედ ფესტივალზე მომხდარმა ინციდენტმა განაპირობა.
სარჩელები, რომლებიც გარდაცვლილი პირების ოჯახის წევრებმა შეიტანეს, უკვე დაკმაყოფილდა.
