ამერიკაში მოღვაწე მომღერალმა ლიზა ყენიამ მსმენელს ახალი მუსიკალური პროექტი Elizabeth Frisky წარუდგინა. ამ სასცენო სახელით არტისტი ახალ ალბომზე მუშაობს და მსმენელმა დაანონსებული ნამუშევრიდან უკვე რამდენიმე სინგლიც მოისმინა. ამჯერად არტისტმა მუსიკალური ვიდეო გამოუშვა, რომელიც გადაღებულია ტრეკზე – Flow High.
სიმღერა ერთი წლის წინ დაიწერა, როდესაც მუსიკოსმა ალბომზე მუშაობა დაიწყო. მუსიკალური ნამუშევარი საკმაოდ სენსიტიურ თემას, ნარკოდამოკიდებულებას და მასთან ბრძოლას ეხება.
Elizabeth Frisky (ლიზა ყენია):
„სიმღერა ნარკოდამოკიდებულ ადამიანზეა, რომელიც, პირველ რიგში, საკუთარ თავს მოუწოდებს, გამოფხიზლდეს, დაფიქრდეს რას მოიხმარს. ეს ყველაზე საზარელი და შავი ხვრელია ადამიანის ცხოვრებაში. ეს თემა ბავშვობიდან მტკივა და მაწუხებს, რადგან ნარკოტიკმა რამდენიმე უძვირფასესი ადამიანი წამართვა. ჯერ კიდევ თინეიჯერი ვიყავი, როდესაც პირველად დავკარგე მეგობარი, რომელიც დამოკიდებულებას ებრძოდა, მაგრამ დამარცხდა. მას შემდეგ კიდევ რამდენიმე ტრაგიკული შემთხვევა იყო. მინდოდა, ჩემი ტკივილი გადმომეცა და მსურდა, მომხმარებლებისათვის ეს ერთგვარი სიგნალი ყოფილიყო. ჩემთვის, როგორც არტისტისთვის, ერთგვარი მოვალეობაა, რომ მსმენელს კარგისაკენ მოვუწოდო – თუნდაც შევძლო, ოთხ წუთში შევახსენო, რომ უნდა გაძლიერდეს და იმ მონსტრს მოერიოს, რომელიც პიროვნებაში ცხოვრებას იწყებს.”
როგორც Elizabeth Frisky აღნიშნავს, ვიდეო სიმღერის შინაარსის შესაბამისი ხასიათის მატარებელია. კლიპში ილუსტრაციები და ე.წ. Cartoon კადრებია გამოყენებული. „მინდოდა საყურებლად ლამაზი და ფერადი ყოფილიყო, მიუხედავად იმისა, რომ დამოკიდებული ცხოვრება, ვფიქრობ, შავ-თეთრი და ძალიან სევდიანია” – ამბობს მომღერალი „Billboard საქართველოსთან” საუბრისას.
როგორც ლიზა ყენია აღნიშნავს, ამ ვიდეოზე მუშაობა მისთვის ერთ-ერთი გამორჩეული და დასამახსოვრებელი გამოცდილებაა. კლიპი ლას ვეგასშია გადაღებული, რამაც ნამუშევარს თავისი ავთენტური და დამახასიათებელი ატმოსფერო შესძინა.
„ხუთი დღის განმავლობაში მუშაობა წარმოუდგენელ სიცხეში გვიწევდა. ამპერიოდში ლას ვეგასში განსაკუთრებით მაღალი ტემპერატურა იყო და გვაფრთხილებდნენ, რომ შენობები არ დაგვეტოვებინა. თუმცა ჩვენ ამის დრო არ გვქონდა – ეს იყო ის შანსი, რომელიც უნდა გამოგვეყენებინა და ვფიქრობ, შევძელით. ადგილობრივი ამერიკელები დაგვეხმარნენ – უზრუნველგვყოფდნენ მანქანებით, ლოკაციებით.”
შეგახსენებთ, რომ Flow High-ის გამოშვებამდე, Elizabeth Frisky-მ ორი სინგლი – Lavender და Keep Burning გამოსცა. როგორც არტისტმა „Billboard საქართველოსთან” უწინდელ ინტერვიუში აღნიშნა, დაანონსებული ალბომი ჟანრობრივად მრავალფეროვანია და მოიცავს ისეთ მუსიკალურ მიმდინარეობებს, როგორიც არის ჰიპ ჰოპი, R&B , Funk და ასე შემდეგ. მომღერლის თქმით, ცდილობს, ალბომის თითოეული სიმღერით ისეთ საკითხებს შეეხოს, რაც ძირითადად მის გარშემო მომხდარს, ბავშვობას, პერსონალურ ისტორიებს და ტკივილს უკავშირდება, თუმცა ამასთანავე სურს, რომ ყველა სიმღერის ბოლოს მსმენელში იმედმა გაიღვიძოს.
ნახეთ Elizabeth Frisky-ის მუსიკალური ვიდეო, რომელიც გადაღებულია სიმღერაზე – Flow High:
