17 სექტემბერს ბათუმში უკვე ტრადიციად ქცეული ბათუმის საავტორო კინოს საერთაშორისო ფესტივალი (BIAFF) გაიხსნა. ერთი კვირის განმავლობაში კინომოყვარულებს შესაძლებლობა აქვთ, ქართული და უცხოური ფილმების კინოჩვენებებს დაესწრონ. Ჩვენებები კინოთეატრ „აპოლოსა” და ევროპის მოედანზე მოწყობილ ღია სივრცეში მიმდინარეობს. წელს ეს BIAFF-ის რიგით მე-18 საფესტივალო წელია. ფესტივალის პროგრამა, ტრადიციულად, როგორც საკონკურსო სექციებს, ასევე არასაკონკურსო ჩვენებებს მოიცავს.
ზვიად ელიზიანი – BIAFF-ის მენეჯერი:
„გვაქვს ორი საკონკურსო სექცია. პირველი, ეს არის მხატვრული ფილმების საერთაშორისო კონკურსი, სადაც 10 ფილმია წარმოდგენილი. მათ შორის იქნება ორი ახალი ქართული ფილმის პრემიერაც: თინათინ ყაჯრიშვილის „მოქალაქე წმინდანი” და ელენე ნავერიანის „შაშვი შაშვი მაყვალი”. მეორე კი არის მოკლემეტრაჟიანი ფილმების კატეგორია. ამ სექციაში სულ 20 ფილმი იქნება ნაჩვენები, მათ შორის 5 ქართული. გარდა ამისა, გვაქვს ტრადიციული არასაკონკურსო კატეგორიები: „ქართული პანორამა”, სადაც ათამდე ქართული ფილმია წარმოდგენილი როგორც მხატვრული, ასევე მოკლემეტრაჟიანი. ასევე „დიდოსტატთა კოლექცია”, სადაც ცნობილი კინორეჟისორების ბოლო ფილმები იქნება ნაჩვენები. მათ შორის ისეთი რეჟისორების, როგორებიც არიან ქრიშტოფ ზანუსი, მარკო ბელოკიო და სხვები. ისევ გვექნება კატეგორია „ფოკუსი უკრაინა” და განვაგრძობთ თანამშრომლობას CINEDOC-თანაც. ფესტივალზე ისინი დოკუმენტურ პროგრამას წარმოადგენენ.”
საკონკურსო ფილმებს საერთაშორისო ჟიური შეაფასებს. მხატვრული ფილმების კატეგორიაში 5 წევრისგან შემდგარ ჟიურის გიორგი ოვაშვილი ხელმძღვანელობს. მოკლემეტრაჟიანი ფილმების სექციას კი სამკაციანი ჟიური შეაფასებს თამარ ბართაიას ხელმძღვანელობით. გამარჯვებულები ფესტივალის დასკვნით ღონისძიებაზე გამოვლინდებიან.
„გარდა იმისა, რომ გამოცხადდება გამარჯვებული ფილმები, ჩვენ გვაქვს ასევე სპეციალური პრიზი კინოხელოვნების განვითარებაში შეტანილი წვლილისთვის, რომელიც წელს ორ ქართველს გადაეცემა: ზურა ყიფშიძეს – მსახიობს და ზურა მახათაძეს, რომელიც ათწლეულებია ქართულ კინოარქივს კურირებს და დიდი წვლილი მიუძღვის მის შენარჩუნებაში. ასევე წელს ჩვენ გვეყოლება სპეციალური სტუმარი და გვინდოდა, ფესტივალის სახელით მისთვისაც გადაგვეცა პრიზი. ეს არის ჯაზის ერთ-ერთი ყველაზე გამორჩეული ქართველი ქალი შემსრულებელი გიული ჩოხელი. BIAFF მას სპეციალურ პრიზს გადასცემს.
წელს BIAFF ბათუმელი რეჟისორის ზაზა ხალვაშის ბოლო ფილმით „ლოტო” გაიხსნა, რომელიც შემოქმედებითმა ჯგუფმა რეჟისორის გარდაცვალების შემდეგ დაასრულა. ფესტივალის დახურვა კი 24 სექტემბერს დაჯილდოების ცერემონიით შედგება და BIAFF მაყურებელს, ტრადიციულად, მომავალ სექტემბრამდე დამეშვიდობება.
„BIAFF უკვე სექტემბრის ტრადიციული, მნიშვნელოვანი და საინტერესო მოვლენა გახდა. ყოველთვის Ძალიან საინტერესო პროგრამა გვაქვს და ყველა ის ფილმი, რასაც ჩვენ ვაჩვენებთ, ფაქტობრივად, პრემიერაა საქართველოში. მით უმეტეს, ეს ფილმები, როგორც წესი, შემდგომ არ გადის კინოგაქირავებაში, ამიტომ, რა თქმა უნდა, ყველა კინომოყვარულისთვის ძალიან კარგი შესაძლებლობაა ამ მხრივ. მათ ასევე აქვთ საშუალება, უშუალოდ შეხვდნენ ამ ფილმების ავტორებს, გაესაუბრონ, დაუსვან შეკითხვები. თითქმის ყველა ქართული ფილმის ავტორია ჩამოსული და უცხოელი რეჟისორებიდანაც რამდენიმე ესწრება თავისი ფილმის ჩვენებას. ასე რომ, აქტიურობა საკმაოდ დიდია. ზოგადად, BIAFF-ს უკვე თავისი აუდიტორია ჰყავს და ძალიან ელოდებიან ხოლმე, განსაკუთრებით თვითონ ბათუმელები. საერთაშორისო მასშტაბითაც ამ 18 წლის განმავლობაში ბევრი საინტერესო კონტაქტები დაგვიგროვდა. უცხოელი რეჟისორების მეშვეობითაც, ვინც ჩამოდის ჩვენს ფესტივალზე, რა თქმა უნდა, ვრცელდება ინფორმაცია კინო და საფესტივალო წრეებში და შეიძლება ითქვას, რომ ბათუმსაც უკვე თავისი ადგილი უჭირავს კინოფესტივალების რუკაზე. ეს არ არის ისეთი მასშტაბური ფესტივალი, როგორც, ვთქვათ, ბევრი ევროპული ფესტივალია, მაგრამ რეგიონში თავის როლს – იქნება ეს კინოს განვითარება თუ ქალაქისა და რეგიონის პოპულარიზაცია – ნამდვილად ასრულებს და ვფიქრობ, საკმაოდ მნიშვნელოვანი მოვლენაა.”
ფესტივალის კინოსეანსების განრიგი შეგიძლიათ ნახოთ ბმულზე.
