Killages ახალ სინგლს – Euphoria-ს აზიარებს. ტრეკის კომპოზიტორი ანრი ყაველაშვილია, ხოლო ტექსტი გუგა მაჭარაშვილს ეკუთვნის.
ტრეკი ჯგუფისათვის დამახასიათებელი დინამიკური მელოდიით და ჟღერადი ვოკალური ნაწილით ხასიათდება.
გუგა მაჭარაშვილი:
„Euphoria ორი წლის წინ დაიწერა. ამ პერიოდის განმავლობაში ბოლომდე ვერ დავასრულეთ, რადგან პარალელურად სხვადასხვა პროექტზე, თუ ტრეკზე ვმუშაობდით. რაღაც პერიოდის შემდეგ რომ მოვუსმინეთ, მოგვინდა საბოლოო სახე მიგვეცა და მსმენელისთვის გაგვეზიარებინა. ამ ტრეკში მთავარი ანრია, სწორედ მას ეკუთვნის ფროდაქშენი და შემდეგ მე ვოკალები ჩავწერე.“
Euphoria ამჟამად ყველა მუსიკალურ სტრიმინგ პლატფორმაზეა ხელმისაწვდომი. სინგლის გარეკანის ავტორი ანანო ლეკიაშვილია.
აღსანიშნავია, რომ პირველ დეკემბერს Killages მსმენელის წინაშე Billboard Georgia Stage-ის მუსიკალური საღამოების სერიის ფარგლებში წარდგება. კონცერტი Republic Event Hall-ის სცენაზე გაიმართება.
გუგა მაჭარაშვილი:
„კონცერტებისათვის ყოველთვის განსაკუთრებულად ვემზადებით და ასევე განსაკუთრებულად ველოდებით, რადგან ამ დროს ჩვენს გულშემატკივრებს ვხვდებით. ამ ლაივზე მსმენელი ნაცნობ ტრეკებთან ერთად, ახალ მუსიკალურ ნამუშევრებსაც მოისმენს.“
Killages ქართული ალტერნატიული ჰიპ-ჰოპ ჯგუფია, რომელიც 2016 წელს, რუსთავში დაარსდა. ჯგუფის წევრები გუგა მაჭარაშვილი, ანრი ყაველაშვილი და რატი რატიანი არიან. 2020 წელს ჯგუფმა სადებიუტო ალბომი – Original Brothers გამოუშვა. 2023 წელს კი, მუსიკალური კოლექტივის რიგით მერე ალბომი, სახელწოდებით Outcast გამოვიდა.
