Lua სიმღერის Mood Swingz-ის ახალი ვიზუალის და მისი შექმნის ისტორია გვიყვება.
Lua:
„სიმღერას ჰქვია Mood Swingz – რაც ხასიათის ცვლილებას ნიშნავს. ცხოვრებაში მქონდა პერიოდი, როცა ძალიან ხშირად მეცვლებოდა ხასიათი. ძალიან ბევრ რაღაცაში მიშლიდა ეს ხელს მათ შორის კონცენტრაციაშიც და მართლა ძალიან შემაწუხებელი იყო. თერაპიაც ვცადე, თუმცა დიდად არ გამომადგა და მერე, როგორც ხდება ხოლმე არტისტების ცხოვრებაში, როცა რთულ პერიოდებს სიმღერებად ვაქცევთ, აქაც ესე მოხდა. გადავწყვიტე ყველაფერი სიმღერაში გადამეტანა და ესე შეიქმნა სიმღერა Mood Swingz.
სიმღერის სახელი ძალიან კარგად გამოხატავს თავად ამ სიმღერას და ჩემი პიროვნების ხასიათსაც, იმიტომ რომ ძალიან ცვალებადი ადამიანი ვარ, რაც ჩემს მუსიკაშიც კარგად ჩანს. ერთ ჟანრში ვერასდროს ვჩერდები, ამას მუსიკალურ თავგადასავალს ვეძახი, რაც მგონია რომ ყველა მუსიკოსმა უნდა ცადოს და ბევრ ჟანრში უნდა იმოგზაუროს. ერთის მხრივ ეს კარგია, მაგრამ ვიცი, რომ ერთ დღეს რაღაც დათმობებზე მომიწევს წასვლა და იმას მივაგნებ, რაც ჩემი იქნება და ბოლომდე ამას გავყვები.
ვაპირებ ალბომი გამოვუშვა, რომელიც ახლა წერის და მუშაობის პროცესშია, ერთ-ერთი სიმღერაა Mood Swingz, რომელიც ამ ალბომში შედის. მისი დადებაც სინგლად გადავწყვიტე, იმიტომ, რომ ალბომის ხასიათსაც უხდება, არა ჟანრობრივად, არამედ სახელით. მთელი ეს ალბომი ერთ ჟანრში არ იქნება, სხვადასხვა ჟანრია გაერთიანებული, სადაც ჩემ თავს მკვეთრად ვხედავ. საკმაოდ მრავალფეროვანი იქნება და ვფიქრობ 2024-ში გამოვა. მინდა, რომ პროცესს მივენდო და როცა ვიგრძნობ, რომ დასრულებულია სწორედ მაშინ გამოვუშვა.
ისიც უნდა ითქვას, რომ ეს ალბომი და ეს სიმღერაც მთიანად ჩემი გაკეთებულია, რაც იმას გულისხმობს, რომ სიმღერებს მე ვწერ. რექორდინგს და პროდიუსინგსაც მე ვაკეთებ. მიქსინგს და მასტერინგს გიორგი ქორიძე აკეთებს, რომელსაც არ ვღალატობ, ძალიან კარგი ხმის ინჟინერია. აპრილში პირველი EP Fuck გავაკეთე, ჩემი პროდიუსერობით და ეს ერთგვარი ექსპერიმენტი იყო, რის შემდეგაც კიდევ უფრო დავიხვეწე.
სიმღერის ვიზუალაიზერი ჩემი მეგობრის ლისა ღლონტის შექმნილია, რომელიც ახლა გერმანიაში ცხოვრობს. ძსიმღერას Lo Fi – ვიზუალი აქვს და მგონია რომ უხდება, რადგან თვითონ სიმღერაც ამ სტილშია.
