კანიე უესტისა და ტაი დოლა საინის ალბომი დაგეგმილ დროს, 15 დეკემბერს არ გამოიცა. უესტის წარმომადგენელმა Billboard-ს ალბომის გამოცემის ახალი თარიღი ამცნო. ალბომი სახელწოდებით Vultures 31 დეკემბერს, ახალი წლის ღამეს გამოვა.
ბოლო კვირების განმავლობაში Vultures აქტიურად იყო განხილვის თემა, თუ გავითვალისწინებთ უესტის კონტროვერსიულ რეპლიკებსა და ნებართვების პრობლემებს. მაგალითად, სიმღერისთვის Everybody, რომელშიც Backstreet Boys-ის ჰიტის Backstreet Back-ის სემპლია გამოყენებული, გავრცელებული ინფორმაციით, კანიეს ჯგუფისგან ნებართვა არ აუღია. ამასთანავე, წინა კვირას უესტს ნებართვა არც ნიკი მინაჟმა მისცა მათ 2018 წლის ერთობლივ ნამუშევარზე New Body. მინაჟმა კანიეს შეტყობინებას ინსტაგრამის ლაივის დროს უპასუხა.
„რაც შეეხება კანიეს, მაგ მატარებელმა უკვე ჩაიარა. არანაირი უპატივცემულობა, უბრალოდ მე ახლახან გამოვუშვი სრულიად ახალი ალბომი. და რატომ გამოვუშვებ ახლიდან სიმღერას, რომელიც სამი წელია გამოცემულია?”
მინაჟს კი უესტი გამოეხმაურა და თქვა: „ამ გოგოს სამჯერ გადავაწერინე თავისი სტროფი Monster-ისთვის. მე მის კარიერას მხარს ვუჭერდი.” უესტი ალბომის პრეზენტაციისას ასევე მწვავედ შეეხო რამდენიმე ვარსკვლავს, მათ შორის იყვნენ ჯეი-ზი, დრეიკი, ტრევის სკოტი და დონალდ ტრამპი. „დრეიკ, ეს ის არის, რასაც ელოდი. ჯეი-ზი, ეს ის არის, რასაც ელოდი. Adidas, ეს არის ის, რასაც ელოდი. კიმ, ეს არის ის, რასაც ელოდი.”
Vultures 31 დეკემბერს გამოვა.
