13 იანვარს Billboard Georgia Stage ბრაზილიელ მუსიკოსს San-ს დაეთმობა. კონცერტს, ტრადიციულად, „რესპუბლიკა” უმასპინძლებს.
ბრაზილიელი მუსიკოსი დანიელ სანტიაგო, სასცენო სახელით San, აღიარებულია, როგორც ერთგვარი ხიდი როკსა და სამბას შორის. იგი ცნობილია თავისი შეუზღუდავი დიაპაზონითა და განუყოფელი ტამბურინით, რომელზე დაკვრაც სულ რაღაც ორი წლის ასაკში დაიწყო. სცენაზე სანტიაგო 15 წლის ასაკში დადგა და მას შემდეგ აღარ გაჩერებულა.
2006 წელს მეგობრებთან ერთად ჯგუფი შექმნა, მათი თქმით, სახალისოდ და ხარისხიანი სამბის დასაკრავად. ჯგუფი მალე გახდა ცნობილი მთელი ქვეყნის მასშტაბით და 2009 წელს მათი პირველი ალბომი Sambô Ao Vivo გამოვიდა. ამავე წელს San-მა თავისი სოლო ალბომიც გამოსცა, სახელწოდებით O Traço Vol. 1.
San-ს მონაწილეობა აქვს მიღებული არაერთ მნიშვნელოვან მუსიკალურ ფესტივალში და თანამშრომლობდა სხვადასხვა ჟანრის ისეთ ცნობილ მუსიკოსებთან, როგორებიც არიან სეუ ჟორჟი, ბენიტო დი პაულა, ლუსიანა მელო და სხვები. იგი ასევე არის ავტორი საუნდტრეკებისა სხვადასხვა შოუსა თუ ფილმისთვის.
2017 წელს გამოიცა ალბომი Sandamí 100 Anos de Samba, სადაც შესულია 1910 წლიდან დღემდე დაწერილი სამბას კომპოზიციები მუსიკოსის ინტერპრეტაციებითა და მისი უნიკალური სტილით. 2019 წელს San-მა შექმნა მუსიკალური საცირკო წარმოდგენა, რომელიც მიწიდან 30-40 მეტრის სიმაღლეზე სრულდება. 2020 წელს კი მან სახლში ჩაწერა და გამოსცა 5 სიმღერისგან შემდგარი ალბომი, რომლის კომპოზიციებიც კარანტინის პერიოდში იქმნებოდა და ყოველ ორ კვირაში ერთხელ ქვეყნდებოდა.
წელს გამოვიდა მუსიკოსის DVD პროექტი სახელწოდებით SAN7, სადაც მისი კარიერის ჰიტები და ასევე აქამდე გამოუცემელი სიმღერებია შესული. ეს არის ლაივში ჩაწერილი პროექტი სახლის ეზოში, რომელიც სავსეა მეგობრებით, მუსიკოსებით, პერკუსიით, პიკნიკით, სამბით, ცირკითა და მხიარულებით. „ჩემთვის დაკვრა და სიმღერა ყოველთვის წვეულებაა. სწორედ ამიტომ შევქმენით ეს ატმოსფერო ჩემი ახალი პროექტისთვის,” – ამბობს მუსიკოსი.
