რთულია, გამოარჩიო მადონას ერთი კონკრეტული კოსტიუმი, როცა მის 40-წლიან კარიერას გადახედავ. თუმცა სიის სათავეში ალბათ მაინც ჟან-პოლ გოტიეს მიერ შეკერილი კორსეტია კონუსური ბიუსტჰალტერით, რომელიც დიზაინერმა მომღერლის 1990 წლის ტურნესთვის შექმნა.
დღეს კი ეს კოსტიუმი მაისურებზე გადაინაცვლებს. მადონას 40-წლიანი კარიერის აღსანიშნავი ტურნე, რომელიც შარშან ლონდონში დაიწყო, მოიცავს კომერციულ ნივთებს, რომლებიც მისი სავიზიტო კოსტიუმების შთაგონებითაა შექმნილი. თუმცა ეს კონკრეტული შემთხვევა განსხვავებულია. პირველ რიგში, იმიტომ, რომ ეს არის ექსკლუზიური თანამშრომლობა პოპის დედოფალსა და ფრანგული მოდის პროვოკატორ დიზაინერს შორის. მეორე მიზეზი კი ქველმოქმედებაა. მადონას ინსტაგრამის პოსტის საშუალებით ვიგებთ, რომ მაისურების გაყიდვით შემოსული თანხა საქველმოქმედო ორგანიზაციას მოხმარდება, რომელიც თავად მომღერალმა 20 წლის წინ დააარსა.
„ვის არ ახსოვს ჩემი საკულტო კორსეტი, რომელიც ერთადერთმა და განუმეორებელმა ჟან-პოლ გოტიემ შექმნა ჩემი 1990 წლის Blonde Ambition ტურნესთვის?!” – წერს მადონა. „ახლა თქვენ შეგიძლიათ გქონდეთ ექსკლუზიური მაისური, შექმნილი იმ კაცის მიერ, რომელმაც ის შეკერა და იმ ქალის მიერ, რომელსაც ის ეცვა – მე. ამ თანამშრომლობით შემოსული თანხა სრულად გადაეცემა საქველმოქმედო ფონდს და სამედიცინო ხარჯებს აუნაზღაურებს მერსი ჯეიმსის პედიატრიული ქირურგიისა და ინტენსიური თერაპიის ცენტრში მყოფ ბავშვებს.”
მერსი ჯეიმსის ცენტრს მადონას თინეიჯერი გოგონას, მერსი ჯეიმსის სახელი ჰქვია, რომელიც მომღერალმა 2009 წელს იშვილა. მერსი ჯეიმსი ახლა მადონას ტურნეს ნაწილია და ყველა კონცერტში თავის საფორტეპიანო უნარებს წარმოაჩენს. მომღერლის ექვსი შვილიდან ოთხი რეგულარულად მონაწილეობს საერთაშორისო ტურნეში.
ნახეთ მადონას პოსტი და საკულტო კორსეტის მაისური:
