11 თებერვალს გამართულ “სუპერ ბოულის” ფინალზე ბიონსემ მსმენელებს მოულოდნელი სიახლე წარუდგინა. მომღერალმა ორი ახალი სიმღერა, 16 Carriages და Texas Hold ‘Em გამოსცა და ახალი ალბომიც დააანონსა. ანონსის ვიზუალური ესთეტიკიდან გამომდინარე, სტუდიური ჩანაწერი ქანთრი ჟანრის იქნება.
16 Carriages ერთგვარი ავტობიოგრაფიული ბალადაა და მომღერლის ძლიერ ვოკალურ შესაძლებლობებს კარგად წარმოაჩენს. რიცხვი 16 ბიონსესთვის მნიშვნელოვანია: სწორედ ამ ასაკის იყო მომღერალი, როცა ჯგუფ „დესტინის ჩაილდთან“ ერთად ხმის ჩამწერ კომპანია „კოლამბიასთან“ კონტრაქტი გააფორმა და პირველი წარმატებული სინგლი, No, No, No გამოუშვა. სიმღერის 16 Carriages ტექსტი ბიონსეს ცხოვრებიდან სხვადასხვა მონაკვეთებს ეხება და მუსიკოსის ადრეულ ოცნებებზე გვიამბობს. რაც შეეხება მეორე სიმღერას, Texas Hold ‘Em, ეს არის მუსიკალური ნამუშევარი, რომელშიც ტემპი და ფოლკის გავლენა იგრძნობა.
აღსანიშნავია, რომ 32 გრემის მფლობელი მუსიკოსი ქანთრის მიმართ ინტერესს პირველად არ იჩენს. ჯერ კიდევ 2016 წელს ბიონსემ გამოსცა ტრეკი Daddy Lessons, რომელიც სწორედ ქანთრის ჟანრობრივი გავლენით გამოირჩევა. სიმღერა შესულია მომღერლის მეექვსე სტუდიურ ალბომში Lemonade.
ამ დროისათვის ბიონსეს ბოლო ალბომია 2022 წელს გამოცემული Renaissance. Ეს არის სამმოქმედებიანი ალბომების სერიის ნაწილი და, როგორც აღმოჩნდა, ამ სერიის გაგრძელება ქანთრი ჟანრის ალბომი იქნება.
