ჟურნალ „თაიმსთან“ ინტერვიუში ლეგენდარულმა ბრიტანელმა მომღერალმა როდ სტიუარტმა იმ ახალგაზრდა არტისტებზე ისაუბრა, რომელთა შემოქმედებაც, მისი აზრით, დროის გამოცდას გაუძლებს.
79 წლის მუსიკოსმა დაასახელა ისეთი სიმღერები, როგორიცაა, მაგალითად, Maggie May და თქვა, რომ მისი აზრით, ის 50 წლის შემდეგაც პოპულარული იქნება.
„ერთი მუსიკოსი მომწონს, ოღონდ, არ მახსოვს, რა ქვია. ბრიტანელია და ძალიან ნიჭიერი ახალგაზრდაა. ვფიქრობ, მისი მუსიკა დროს გაუძლებს”, – თქვა როდ სტიუარტმა, ხოლო როდესაც ჟურნალისტმა ჰკითხა, გულისხმობდა თუ არა ედ შირანს, სტიუარტმა უპასუხა, რომ მისი არცერთი სიმღერა არ აქვს მოსმენილი.
Საბოლოოდ აღმოჩნდა, რომ როკის ლეგენდა ჯორჯ ეზრას გულისხმობდა. „ვფიქრობ, ის საოცარ სიმღერებს წერს, რომლებიც აუცილებლად გაუძლებს დროს“ – თქვა შოტლანდიელმა.
აღსანიშნავია, რომ გასულ წელს ედ შირანმა ახალი ალბომი, Autumn Variations გამოსცა, რომლითაც საკუთარი რეკორდი გააუმჯობესა: ალბომმა ბრიტანულ ჩარტში პირველი ადგილი დაიკავა, ამერიკის შეერთებულ შტატებში კი „ბილბორდის“ ალბომების გაყიდვების ჩარტშიც გალიდერდა. Autumn Variations ედ შირანის მეექვსე No.1 ალბომი გახდა.
2023 წელს შირანმა ტურნე The Mathematics Tour დაასრულა, სადაც დასწრების რეკორდი ისეთ სტადიონებზე მოხსნა, როგორებიცაა ნიუ-ჯერსის შტატში მდებარე „მეტლაიფი“ და მელბურნის კრიკეტის მოედანი ავსტრალიაში. ედ შირანმა ტურნეს აზიური ეტაპი იანვარში დაიწყო.
