Შვიდწლიანი პაუზის შემდეგ შაკირა ახალ ალბომს გამოსცემს. სტუდიური ნამუშევარი სახელწოდებით Las Mujeres Ya No Lloran (ქალები უკვე აღარ ტირიან) 22 მარტს გამოიცემა. ნამუშევარი ვინილის ფირფიტების სახითაც გამოვა. აღსანიშნავია, რომ ფირფიტების ყდების ფერები განსხვავებული იქნება.
„ამ ალბომზე მუშაობა ალქიმიური პროცესი იყო. თითოეული სიმღერის დაწერისას საკუთარ თავს ახლიდან ვქმნიდი. მათი შესრულებისას ჩემი ცრემლები ბრილიანტებად იქცა, ჩემი დაუცველობა კი – სიძლიერედ” – განაცხადა შაკირამ ალბომის შესახებ გაკეთებულ განცხადებაში.
ალბომის სახელწოდება აღებულია მუსიკოსის ცნობილი ტრეკიდან – Bzrp Music Sessions, Vol. 53. სწორედ მისი ტექსტი მოიცავს შემდეგ წინადადებას – „ქალები უკვე აღარ ტირიან, ისინი ფულს შოულობენ”.
შაკირას ახალი ალბომის გამოსვლის შესახებ ხმები ჯერ კიდევ მაშინ გავრცელდა, როცა მომღერალმა სოციალურ ქსელში მოკლე ვიდეო გამოაქვეყნა. ვიდეო იმ კლიპების კოლაჟი იყო, რომლებიც შაკირას წარსულში გაოუშვია. ვიდეოს აღწერაში მომღერალმა გამომწერებს მიმართა, რომ სიახლეებს დალოდებოდნენ.
ამ დროისთვის შაკირას ბოლო ალბომი, El Dorado, 2017 წელს გამოიცა. ნამუშევარი „ბილბორდის“ ლათინოამერიკული ალბომების ჩარტში პირველ ადგილს იკავებდა. Ჩანაწერში შესულია ისეთი სინგლები, როგორებიც არის Chantaje, La Bicicleta, Deja vu და სხვა.
შაკირამ თავის სამომავლო გეგმებზე ჯერ კიდევ 2023 წელს, „ბილბორდთან“ ინტერვიუში ისაუბრა. მომღერალი შემოქმედებით პროცესს შეეხო და განმარტა, თუ რატომ დასჭირდა ამდენი წელი ახალი ალბომის გამოსაცემად.
„ბოლოს ალბომი ექვსი წლის წინ გამოვეცი. ხანდახან ვფიქრობ, რომ პოპ-ვარსკვლავობა და მარტოხელა დედობა თავსებადი არ არის. უნდა დავაძინო ბავშვები, შემდეგ წავიდე ხმის ჩამწერ სტუდიაში – ეს ყველაფერი რთულია. როცა არ გყავს ქმარი, რომელიც ბავშვებთან დარჩება, ყველაფერი რთულდება” – განმარტა შაკირამ ინტერვიუში.
