Sony Music Entertainment უიტნი ჰიუსტონის შესახებ 2022 წელს გადაღებული ფილმის Whitney Houston: I Wanna Dance With Somebody-ის პროდიუსერებს უჩივის და მათ საავტორო უფლებების დარღვევაში ადანაშაულებს.
ნიუ-იორკის ფედერალურ სასამართლოში შეტანილ სარჩელში Sony ამტკიცებს, რომ ფილმის საპროდიუსერო კომპანიებმა ხელი მოაწერეს სალიცენზიო შეთანხმებას უიტნი ჰიუსტონის სიმღერების გამოყენების შესახებ. მას შემდეგ წელიწადზე მეტი გავიდა, თუმცა Sony-ს კუთვნილი თანხა ჯერ კიდევ არ მიუღია.
„ამ დრომდე Anthem-ს არ დაუფარავს შეთანხმებით განსაზღვრული გადასახადი ან ამ გადასახადის ნაწილი მაინც,” – აღნიშნავს Sony Music-ის ადვოკატი.
სარჩელის მიხედვით, საპროდიუსერო კომპანია Anthem Films-მა Sony Music-თან სალიცენზიო ხელშეკრულებას ხელი 2022 წლის 5 დეკემბერს მოაწერა, ფილმის გამოშვებამდე 10 დღით ადრე. ხელშეკრულება მოიცავდა შეთანხმებას ჰიუსტონის ისეთი სიმღერების გამოყენებაზე, როგორებიცაა Greatest Love of All, I’m Every Woman და თავად ფილმის სათაურში გამოყენებული I Wanna Dance with Somebody.
„სხვა ტიპის ფილმებისგან განსხვავებით, მუსიკალური ბიოგრაფიული ფილმები მოითხოვს მთავარი მუსიკოსი გმირის მუსიკის გამოყენებას, Რადგან თითქმის შეუძლებელია გადმოსცე მუსიკოსის უნიკალური სტილი და ნიჭი მისი მუსიკის გარეშე,” – წერს Sony. „მათ იცოდნენ ავტორიზაციის აუცილებლობის შესახებ იმისთვის, რომ ფილმში უიტნი ჰიუსტონის სიმღერები გამოეყენებინათ. შესაბამისად, Anthem-მა ჩვენთან სალიცენზიო შეთანხმება გააფორმა.”
თუმცა უკვე აგვისტოში Sony-მ განაცხადა, რომ კუთვნილი თანხა არ მიუღია. მათი ინფორმაციით, Anthem-მა მაშინ თქვა, რომ თანხის გადასახდელად მასაჩუსეტსის შტატიდან მისაღებ გადასახადს ელოდებოდა. Sony მზად იყო, დალოდებოდა მასაჩუსეტსის გადმორიცხვას, მაგრამ ითხოვდა, რომ ეს შეთანხმება წერილობით გაფორმებულიყო, რაზეც Anthem-მა უარი განაცხადა.
სარჩელში მოპასუხე მხარედ მოხსენიებულია კომპანიები: Anthem Film, NYBO Productions, Black Label Media და WH Movie. პირველი ორს საავტორო უფლებების პირდაპირ, ხოლო დანარჩენ ორს არაპირდაპირ დარღვევაში ადანაშაულებენ.
Billboard-ისთვის მიცემულ კომენტარში Black Label-ის წარმომადგენელმა აღნიშნა, რომ კომპანია მხოლოდ ერთ-ერთია ფილმის მრავალ ინვესტორს შორის და სარჩელში ის არ უნდა მოეხსენიებინათ. შესაბამისად, იმედი გამოთქვა, რომ ბრალდებულთა სიიდან მალე ამოიღებენ. სხვა კომპანიები ამ ეტაპზე Billboard-ს არ გამოხმაურებიან. დამატებითი კომენტარი ამ დრომდე არც Sony Music-ის წარმომადგენლებს გაუკეთებიათ.
