2023 წელს ქართულ მუსიკალურ სივრცეში ახალი პროექტი, Zuk n’ Sos გაჩნდა. ჯგუფის შემადგენლობაში ზუკა სიმონიშვილი (გიტარა/სინთეზატორი) და სოსო ცაგარეიშვილი (დრამი/ფორტეპიანო/ვოკალი) არიან. ახლახან ჯგუფმა სადებიუტო ალბომი გამოსცა, რომლის სახელწოდებაა Cake Recipe. როგორც Zuk n’ Sos-ის წევრი, სოსო ცაგარეიშვილი „Billboard საქართველოსთან” საუბრისას ამბობს, ალბომი შინაგანი ემოცების გამოხატვის ახლებური და ექსპერიმენტული ფორმაა, რომელიც ჯგუფის ჩამოყალიბების მსგავსად, სპონტანური იდეით გაჩნდა.
სოსო ცაგარეიშვილი:
„მგონია, რომ ტრეკი Cake Recipe, რომლის სახელიც შემდეგ ალბომს დაერქვა, ძალიან ზუსტად ასახავს ჩვენს ჩანაფიქრს. Cake Recipe-ზე დაახლოებით 4-5 თვის განმავლობაში ვმუშაობდით. ალბომი არაერთი მუსიკალური შთაგონების შედეგია, მაგრამ ყველაზე მეტად ალბათ მაინც ჯაზის გავლენა იგრძნობა.”
ალბომი ორ კოლაბორაციულ ნამუშევარსაც აერთიანებს. ტრეკი სახელწოდებით Peter Pan ლუასთან მუსიკალური თანამშრომლობის შედეგია, Painter კი ხონძისთან (საქსოფონი) ერთად ჩაიწერა.
სოსო ცაგარეიშვილი:
„Peter Pan ალბომის გამოცემამდე სინგლის სახით დაახლოებით ორი თვით ადრე გავუზიარეთ მსმენელს. ტექსტზე მე, ზუკამ და ლუამ ერთად ვიმუშავეთ. მუსიკიდან გამომდინარე გვინდოდა, რომ ტექსტი ფანტასტიკური და ზღაპრული ყოფილიყო. Painter-ში ხონძის სოლომ კი ტრეკსაც და ალბომსაც ახლებური ჟღერადობა შესძინა.”
მუსიკალური პროექტის შექმნიდან დღემდე Zuk n’ Sos მსმენელის წინაშე ორი ლაივით წარდგა, რომლებზეც ჯგუფთან ერთად პაპუნა შარიქაძემაც დაუკრა. 22 მარტს კი ჯგუფი „დედაენის ბარში” ალბომის პრეზენტაციას გამართავს. Zuk n’ Sos მსმენელის წინაშე ახალ ტრეკებს ამჯერადაც პაპუნა შარიქაძესთან ერთად შეასრულებს.
