ბიონსე 2024 წლის პარიზის ოლიმპიური თამაშების კამპანიაში ჩაერთო. 26 ივლისს არტისტმა მოულოდნად გამოუშვა ვიდეო, რომლითაც შეერთებული შტატების ოლიმპიური ნაკრები წარადგინა. ვიდეოს პრემიერა NBCUniversal-ის ეთერში შედგა, როცა პარიზის ოლიმპიური თამაშების გახსნის ცერემონია გადაიცემოდა.
„ჩვენ გვყავს სუპერვარსკვლავები და ჩვენ გვყავს ლეგენდები. ჩვენ გვყავს მეოცნებეები, რომლებიც მთელი თავისი ცხოვრება იბრძოდნენ, რომ აქამდე მოსულიყვნენ,” – ისმის ბიონსეს ხმა ვიდეოში. არტისტს კლიპში შეერთებული შტატების დროშით და თავისი ახალი ალბომის, Cowboy Carter-ის ყდით შთაგონებული კოსტიუმი აცვია.
ვიდეოში ათობით ამერიკელი სპორტსმენი მონაწილეობს. მათ შორის არიან ათლეტები სხვადასხვა სპორტული დისციპლინიდან. შესრულების მანერით ვიდეო ინსპირირებულია ბიონსეს ჰიტით YA YA, რომელიც შესულია ალბომში – Cowboy Carter.
ბიონსემ Cowboy Carter 2024 წლის აპრილში გამოსცა. ალბომმა Billboard 200-ის მუსიკალურ ჩარტში პირველი ადგილი დაიკავა.
რაც შეხება უშუალოდ პარიზის ოლიმპიურ თამაშებს, მსოფლიოს უდიდესი სპორტული მოვლენა საფრანგეთის დედაქალაქში 26 ივლისს საზეიმოდ გაიხსნა. მაყურებელმა სანახაობრივი თეატრალიზებული და მუსიკალური შოუ იხილა. გახსნის ცერემონიაზე მუსიკალური ნომრებით წარდგნენ ლედი გაგა, სელინ დიონი და ფრანგი მომღერალი აია ნაკამურა.
იხილეთ ბიონსეს კლიპი, რომლითაც ვარსკვლავმა შეერთებული შტატების ოლიმპიური ნაკრები წარადგინა:
