ჭორები იმის შესახებ, რომ სელინ დიონი სცენას 2024 წლის პარიზის ოლიმპიადაზე დაუბრუნდებოდა, გამართლდა. ლეგენდარული მომღერალი ოლიმპიური თამაშების გახსნის ცერემონიაზე შთამბეჭდავი გამოსვლით წარდგა.
ვარსკვლავმა ედიტ პიაფის სიმღერა Hymne A L’Amour ეიფელის კოშკიდან შეასრულა, რომელიც ოლიმპიური რგოლებით იყო განათებული. ფორტეპიანოს აკომპანემენტით, თეთრ კაბაში გამოწყობილმა დიონმა აუდიტორიას უნაკლო შესრულება შესთავაზა.
ეს მომღერლის პირველი გამოსვლაა მას შემდეგ, რაც მსოფლიო ტურნე გააუქმა და გაამხილა, რომ ის გაშეშებული ადამიანის სინდრომს ებრძოდა – იშვიათ ნევროლოგიურ აშლილობას, რომელიც კუნთების მძიმე სპაზმს იწვევს.
Სელინ დიონმა სცენაზე დაბრუნების იმედი მსმენელს მასზე გადაღებულ დოკუმენტურ ფილმში I Am: Celine Dion მისცა: „თუ ვერ ვირბენ, ვივლი. თუ ვერ ვივლი, ვიხოხებ… არ გავჩერდები,” – ამბობს ფილმში მომღერალი. კვირის დასაწყისში კი დიონი პარიზში შენიშნეს, სადაც, სასტუმროდან გამოსული, ფანებს მიეგება.
სელინ დიონისთვის ეს არ არის პირველი ოლიმპიური გამოსვლა. 1996 წელს მან ასევე იმღერა ატლანტის ოლიმპიადის გახსნის ცერემონიაზე, სადაც The Power of the Dream შეასრულა.
პარიზის ოლიმპიური თამაშების გახსნის ცერემონიაზე ასევე დაინთო ოლიმპიური ცეცხლი ერთთვიანი ესტაფეტის შემდეგ, რომელშიც Snoop Dogg, ფარელ უილიამსი და BTS-ის ჯინიც მონაწილეობდნენ. მანამდე კი ოლიმპიური სცენა ლედი გაგამ დაიკავა და კაბარეს სტილში ფრანგულ ენაზე Mon Truc en Plume შეასრულა.
