პოპმუსიკისა და პოლიტიკის გულშემატკივრებს არჩევანის გაკეთება მოუწევთ, თუ რას უყურონ 10 სექტემბრის საღამოს: პირველ საპრეზიდენტო დებატებს ყოფილ პრეზიდენტ დონალდ ტრამპსა და ვიცე-პრეზიდენტ კამალა ჰარისს შორის თუ MTV-ის Video Music Awards-ს.
ჰარისთან საპრეზიდენტო დებატებს ტრამპი 8 აგვისტოს დათანხმდა მას შემდეგ, რაც თავდაპირველად მონაწილეობაზე უარი განაცხადა. პასუხად ვიცე-პრეზიდენტმა ტვიტერზე დაწერა: „გავიგე, რომ დონალდ ტრამპი საბოლოოდ ჩემთან დებატებს დათანხმდა. ველოდები.”
საპრეზიდენტო დებატებს პირდაპირი ეთერით ABC გადასცემს. 10 სექტემბერი ის თარიღია, რომელზეც ტრამპი და ბაიდენი მეორე და საბოლოო დებატებზე იყვნენ შეთანხმებული, სანამ ბაიდენი არჩევნებიდან თავის კანდიდატურას მოხსნიდა.
პრეზიდენტობის კანდიდატებს შორის 2024 წლის პირველი დებატები 27 ივნისს შედგა, რომლის შემდეგაც ბაიდენს მეგობრებმა და მოკავშირეებმა მოუწოდეს, არჩევნებს გამოსთიშოდა. 21 ივლისს კი მან განაცხადა, რომ არჩევნებში მონაწილეობას აღარ მიიღებდა და საპრეზიდენტო კანდიდატად მხარს ვიცე-პრეზიდენტ კამალა ჰარისს უჭერდა.
უცნობია, შედგება თუ არა დამატებითი დებატები ტრამპსა და ჰარისს შორის. Fox News-მა კანდიდატებს 4 სექტემბერი შესთავაზა, NBC News-ს კი იმედი აქვს, რომ ტრამპი-ჰარისის დებატებს 25 სექტემბერს უმასპინძლებს. მიჩიგანში ყოფნისას ჰარისმა აღნიშნა, რომ სიამოვნებით განიხილავს დამატებითი დებატების საკითხს.
Რაც შეეხება VMA-ს, MTV-მ 24 აპრილს განაცხადა, რომ დაჯილდოება 10 სექტემბერს შედგებოდა. ამ ზაფხულს ეს უკვე მეორე შემთხვევაა, როცა აქტუალური საპრეზიდენტო მოვლენა დაჯილდოების ცერემონიას ემთხვევა. 2 საათზე ნაკლები იყო დარჩენილი Kids’ Choice Awards-მდე 13 ივლისს, როცა დონალდ ტრამპზე თავდასხმა მოხდა. თუმცა დაჯილდოებამ ჩვეული განრიგით ჩაიარა.
