21 სექტემბერს თბილისს მუსიკალური კოლექტივი Tinariwen ეწვევა. ტუარეგების ჯგუფი საჰარიდან, Seahorse Promotion-ის ორგანიზებით, კონცერტს „მონო ჰოლში” გამართავს.
Tinariwen-ის ისტორიაც იმავე გზას მიჰყვება, რომლის გავლაც თავად ტუარეგ ხალხს მუდმივ გადასახლებებს, აჯანყებებსა და ბრძოლებს შორის უწევთ.
ჯგუფი 1979 წელს ტამარასენტში დაარსდა და თავდაპირველად სწორედ გადასახლებულ ტუარეგთა წვეულებებზე უკრავდნენ. მათი სიმღერები პირდაპირ ეხებოდა მათთვის მტკივნეულ თემებს: სახლის მონატრებას, გამოსახლებას და ა.შ.
ბენდს სახელი არ ჰქონდა. ხალხმა კი მათ Kel Tinariwen შეარქვა – ტამაშეკზე, ტუარეგთა მშობლიურ ენაზე – „უდაბნოს ადამიანები”.
ასე დაიწყო ჯგუფის შემოქმედებითი გზა, რომელსაც მუდმივად ახლდა სირთულეები: აჯანყებები, გადასახლება, ჯგუფის წევრების დაკავება და დევნა. თუმცა მიუხედავად ამისა, მათ არასდროს შეუწყვეტიათ მუსიკის კეთება და ნელ-ნელა Tinariwen-მა მსოფლიო აღიარებაც მოიპოვა.
„Tinariwen-ის მოსმენა სათლის ღრმა ჭაში ჩაშვებას ჰგავს,” – წერდა რობერტ პლანტი.
„რამდენიმე კომპოზიციაა, რომლებშიც ეს გიტარისტები საოცარ რიფებს უკრავენ. მე გადმოვიღე მათი სტილი და 10-წუთიან იმპროვიზაციას ვაკეთებდი. შემდეგ ვიწერდი ამ ბითებს იქამდე, სანამ არ დავიჭირე ის რაღაც, რასაც ისინი აკეთებენ,” – ტომ იორკი.
2005 წელს Tinariwen გახდა BBC-ის Award for World Music-ის მფლობელი. 2009 წელს კი ბენდმა გლასტონბერის ფესტივალზე დაუკრა.
2010 წელს Tinariwen სამხრეთ აფრიკაში გამართული მსოფლიო თასის გახსნის ცერემონიაზე წარდგა. მართალია, მათ ალჟირის დროშის ქვეშ დაუკრეს, მაგრამ თავად თავს არც ალჟირს და არც მალის არ მიაკუთვნებენ. მათი თქმით, ისინი ტუარეგები არიან და იმ საზღვარს ეკუთვნიან, რომელიც ამ ორ ქვეყანას ყოფს, როგორც კოლონიალიზმის პროდუქტი.
2011 წელს ჯგუფმა მეხუთე ალბომი Tassili გამოსცა, რომელიც გრემის მფლობელი გახდა საუკეთესო მსოფლიო მუსიკის ალბომის კატეგორიაში. გრემიზე იყო წარდგენილი მათ მეშვიდე ალბომი Elwan და მერვე ალბომი Amadjar, რომელიც ასევე მომთაბარედ, უდაბნოში გაშლილ კარავში ჩაიწერა.
ამ ეტაპზე ჯგუფს 9 ალბომი აქვს გამოცემული. მათი შემოქმედება ბლუზისა და როკის ნაზავია ტუარეგთა ტრადიციულ მუსიკასთან, რაც ცნობილია, როგორც უდაბნოს ბლუზი (desert blues). ამჟამად Tinariwen ევროპულ ტურნეში იმყოფება, რომლის ფარგლებშიც „უდაბნოს ადამიანები” პირველად თბილისსაც ეწვევიან.
კონცერტი 21 სექტემბერს „მონო ჰოლში” გაიმართება. საღამოს ალექსანდრე ხარანაული და მისი ბენდი გახსნის.
Tinariwen-ის კონცერტი Seahorse Promotion-ის პირველი პროექტია. კომპანია 2024 წელს ესპანელ პარტნიორებთან თანამშრომლობით დაფუძნდა. ამ ეტაპზე უკვე მიმდინარეობს მოლაპარაკებები სხვა საერთაშორისო არტისტებთანაც, რომელთაც ქართველი მსმენელი უახლოეს მომავალში იხილავს.
ბილეთების შეძენა შეგიძლიათ ბმულზე
