20 აგვისტოს ტეილორ სვიფტმა ოფიციალურად დაასრულა „ერას ტური”. მეორე დღეს კი ვარსკვლავმა ინსტაგრამზე ტურნეს ვრცელი პოსტი მიუძღვნა, სადაც ტერორისტული თავდასხმის საფრთხის გამო გაუქმებულ ვენის კონცერტებზე სიჩუმეც დაარღვია.
„ოფიციალურად დავასრულეთ ევროპის ერას ტური. ამ ტურმა მოგვიტანა ახალი ტრადიციები შოუებზე, ყველაზე მონდომებული აუდიტორია, ვისთვისაც კი დამიკრავს და სრულიად ახალი ერა. ეს იყო ყველაზე ჩქარი რიტმი, რაც კი მანამდე გვქონია. ძალიან ვამაყობ ჩემი გუნდითა და ახალგაზრდა შემსრულებლებით, რომლებიც ფიზიკურად შესაძლებელს ხდიდნენ ამ შოუებს, აშენებდნენ და შლიდნენ მასიურ სცენებს და აკეთებდნენ ჯადოქრობას იმ რამდენიმე დღეში. ისინი ყველაზე შთამბეჭდავი ადამიანები არიან, ვისაც კი ვიცნობ და ძალიან იღბლიანი ვარ, რომ მათ თავიანთი დრო, ენერგია და გამოცდილება ერას ტურს დაუთმეს,” – წერს სვიფტი.
მუსიკოსის თქმით, ლონდონის უემბლის სტადიონზე შებიჯება ემოციების ზღვა იყო ვენაში გაუქმებული კონცერტების „გამანადგურებელი” ამბის შემდეგ. „გაუქმების მიზეზმა ახალი შიშით ამავსო ისევე, როგორც უდიდესი დანაშაულის გრძნობით, რადგან ამდენი ხალხი გეგმავდა ამ კონცერტებზე მოსვლას. მაგრამ, ამავდროულად, ძალიან მადლიერი ვიყავი შესაბამისი უწყებების, რადგან სწორედ მათი წყალობით ჩვენ მხოლოდ კონცერტებს ვგლოვობდით და არა სიცოცხლეებს. მე გადავწყვიტე, რომ მთელი ჩემი ენერგია იმ ნახევარ მილიონამდე ადამიანის დაცვას უნდა მოხმარებოდა, რომლებიც ლონდონის შოუებზე მოვიდოდნენ. ჩემი გუნდი და მე ყოველდღიურად ვმუშაობდით სტადიონის თანამშრომლებთან და ბრიტანეთის სამთავრობო უწყებებთან ერთად ამ მიზნის მისაღწევად და მინდა, მადლობა გადავუხადო მათ ყველაფრისთვის, რაც ჩვენთვის გააკეთეს.”
სვიფტმა ის მიზეზებიც ახსნა, რის გამოც ამ თემაზე აქამდე არ საუბრობდა. „პირდაპირ გეტყვით: არ ვაპირებ, საჯაროდ ვილაპარაკო ისეთ რამეზე, რაზე საუბარიც, ვფიქრობ, რომ იმ ადამიანებს გამოიწვევს, რომელთაც ჩემს შოუებზე მოსული გულშემატკივრისთვის ზიანის მიყენება უნდათ. ასეთ შემთხვევებში სიჩუმე თავშეკავებაა და ისეთი დროის დალოდება, როცა საკუთარი თავის გამოხატვა გამართლებულია. ჩემი პრიორიტეტი ევროპული ტურნეს უსაფრთხოდ დასრულება იყო და დიდი შვებით შემიძლია ვთქვა, რომ ეს მოვახერხეთ.”
ნახეთ ტეილორ სვიფტის სრული განცხადება:
