Drugs You Should Try It დიდი ხანია, რაც ტრევის სკოტის ფანების საყვარელი სიმღერაა და როგორც იქნა, გამოშვებიდან 10 წლის შემდეგ კომპოზიციას საკუთარი ვიდეოკლიპი აქვს.
რამდენიმე დღის წინ ტრევის სკოტმა მისი 2014 წლის ალბომი Days Before Rodeo, 10 წლის იუბილეს აღსანიშნავად, ხელახლა გამოსცა. ახლა კი გულშემატკივარს ალბომის ბრილიანტად წოდებული სიმღერის, Drugs You Should Try It-ის ვიდეოკლიპიც წარუდგინა.
ვიდეოკლიპი გარდაცვლილი დიზაინერის, ვირჯილ აბლოს მიერ შექმნილი ნეონის კოვბოის კადრით იწყება. ამგვარად ტრევის სკოტმა აბლოს ხსოვნას მიაგო პატივი.
22 აგვისტოს ტრევის სკოტმა ალბომ Days Before Rodeo-ს 10 წლის იუბილე კონცერტით აღნიშნა. არტისტმა ჩანაწერიდან თითქმის ყველა სიმღერა შეასრულა, მათ შორის Drugs You Should Try It. მან ასევე სცენაზე სპეციალური სტუმრის სტატუსით რეპერი Quavo მოიწვია, რომელთან ერთადაც Sloppy Toppy იმღერა.
Days Before Rodeo-ს ციფრული დელუქს ვერსია დამატებით ხუთ ახალ კომპოზიციას მოიცავს, რომელიც მანამდე არ გამოქვეყნებულა. სავარაუდოა, რომ ალბომი სექტემბრის პირველ კვირაში Billboard 200-ის ჩარტში დაწინაურდება.
ნახეთ ვიდეოკლიპი Drugs You Should Try It:
