2 სექტემბერს წინანდლის ფესტივალის სცენაზე ცნობილი კანადელი პიანისტი ბრუს ლიუ და თბილისის ახალგაზრდული ორკესტრი ცნობილ დირიჟორ, კლაუდიო ვანდელისთან ერთად წარდგება. ვანდელი მსოფლიო მასშტაბით არაერთ ცნობილ ორკესტრთან თანამშრომლობს. 2020 წლიდან ის Würth-ის ფილარმონიის მთავარი დირიჟორია.
ვანდელი საქართველოს წინანდლის ფესტივალის გახსნამდე რამდენიმე კვირით ადრე ეწვია და სოხუმის სახელმწიფო დრამატული თეატრის სცენაზე რეპეტიციები გამართა.
Billboard Georgia-სთან საუბრისას კლაუდიო ვანდელიმ ფესტივალისათვის მზადების პროცესზე ისაუბრა.
„მოხარული ვარ, რომ თბილისის ახალგაზრდულ ორკესტრთან მუშაობის შესაძლებლობა მომეცა. ორკესტრის დამფუძნებელი მაესტრო მირიან ხუხუნაიშვილი ჩემი კარგი მეგობარია და მიხარია, რომ წელს წინანდლის ფესტივალზე ამ ორკესტრთან ერთად წარვდგები. წინანდლის ფესტივალი ამ რეგიონში ახალი მოვლენაა. ეს არის შემთხვევა, როცა ფესტივალი კლასიკური მუსიკის მსოფლიო ვარსკვლავებს აერთიანებს. მასთან ერთად კი ფესტივალმა ჩამოაყალიბა პანკავკასიური ორკესტრი, რომელიც ახალგაზრდა მუსიკოსებისაგან შედგება. ფესტივალის ფარგლებში მათ შეუძლიათ, დიდი გამოცდილება და ცოდნა მიიღონ,” – აღნიშნავს კლაუდიო ვანდელი.
წინანდლის ფესტივალი 31 აგვისტოს გაიხსნება და 8 სექტემბერს დაიხურება.
ფესტივალის პრიგრამის შესახებ დეტალებისათვის ეწვიეთ ბმულს.
