ბრიტანელი მუსიკოსი ადელი გრძელვადიანი მუსიკალური პაუზის აღებას გეგმავს და სურს, ყურადღების ცენტრში ყოფნისგან დაისვენოს. 31 აგვისტოს სუპერვარსკვლავმა მიუნხენში ბოლო შოუს დროს აუდიტორიას სამომავლო გეგმები გაუზიარა. მომღერალი ლას-ვეგასის შოუს დასრულების შემდეგ ხანგრძლივ შესვენებას აპირებს.
„უბრალოდ დასვენება მჭირდება. ბოლო შვიდი წელი ჩემი ახალი ცხოვრების შექმნაში გავატარე, ახლა კი მინდა, მისით ვიცხოვრო. ძალიან მომენატრება ეს ყველაფერი, მაგრამ მინდა იმ ცხოვრებით დავტკბე, რომელსაც ამდენი ხანია ვაშენებ,” – მიმართა ადელმა აუდიტორიას.
მიუნხენში ადელის ათი შოუ წარმატებით დასრულდა. ლას-ვეგასის რეზიდენცია კი Caesars Palace-ში ოქტომბერში დაიწყება, სადაც ადელი კვლავაც ათ შოუს გამართავს.
„ამის შემდეგ საკმაოდ დიდი ხნის განმავლობაში ვეღარ გიხილავთ, თუმცა მთელი ამ შესვენების განმავლობაში ჩემს გულში იქნებით,” – თქვა ადელმა.
ადელმა მუსიკალური შესვენების შესახებ ინფორმაცია ზაფხულის დასაწყისშიც გააზიარა.
„მე არ ვაპირებ ახალ სიმღერებზე მუშაობას. ლას-ვეგასის შოუების შემდეგ ხანგრძლივი შესვენება მინდა. მსურს, ცოტა ხნით სხვადასხვა კრეატიულ საქმიანობას მივყო ხელი. სულაც არ მომწონს რომ ცნობილი ვარ,” – განუცხადა მომღერალმა გერმანულ გამოცემას ZDF.
ადელმა Weekends With Adele-ის შოუები 2022 წლის ნოემბერში დაიწყო. ბოლო ორი წლის განმავლობაში მან 100 ლაივ შოუს უმასპინძლა.
ადელი 2016-17 წლების შემდეგ მსოფლიო ტურნეში არ ყოფილა. მისთვის ალბომსა და ტურნეებს შორის ხანგრძლივი მუსიკალური პაუზების აღება ახალი არ არის. სუპერვარსკვლავს მუსიკალური შესვენებები 2008, 2011, 2015 და 2021 წელსაც ჰქონდა აღებული.
იანვარში ერთ-ერთი Weekends With Adele შოუს დროს მომღერალმა აუდიტორიას მიმართა: „ახალი მუსიკის შექმნასთან დაკავშირებით არანაირი გეგმები არ მაქვს.” – ეს კი იმის მანიშნებელია, რომ თუ ადელი ახალ ალბომს გამოსცემს, შესაძლოა მსოფლიო ტურნეც დააანონსოს.
