ნინი ბრეგვაძე, ამერიკაში ცნობილი, როგორც ნინი აირისი, ახალ სიმღერასა და ვიდეოკლიპს აქვეყნებს. კომპოზიცია Without Your Love მუსიკოსმა რამდენიმე წლის წინ დაწერა, თუმცა აუდიტორიის წინაშე მისი წარდგენა ახლა გადაწყვიტა მასზე გადაღებულ ვიდეოკლიპთან ერთად, რომელზეც ქართულმა კრეატიულმა სტუდიამ A Vivre Sa Vie იმუშავა.
ნინი ბრეგვაძე:
„ეს სიმღერა დაახლოებით 5 წლის წინ დავწერე და აქამდე თაროზე მქონდა შემოდებული, რადგან არ ვიცოდი, რა გამეკეთებინა ფროდაქშენისთვის. ბოლოს კი მივუბრუნდი, რაღაც მოდიფიკაციები გავუკეთე და გადავწყვიტე, რომ ტრეკს დღის სინათლე ენახა.
სიმღერა არის გულისტკენაზე – როცა ადამიანი შემოდის შენს ცხოვრებაში და რაღაც ისეთს გაგრძნობინებს, რაც გგონია, რომ აღარასდროს განმეორდება. ამ ყველაფერს ისეთი გულწრფელობით აკეთებს, რომ შენ ვერ ხვდები, რომ შეიძლება ტყუოდეს. შემდეგ კი ერთი ხელის მოსმით ანადგურებს ისე, თითქოს არც არასდროს ყოფილა. მერე მოდის ეს ემოციები, რასაც გრძნობ: გულისტკენა, სიბრაზე… ალბათ უფრო სიბრაზე, მაგრამ კიდევ უფრო მეტად ეს კითხვის ნიშნები: რა მოხდა საერთოდ და რა იყო ეს?!
სიმღერის ფროდაქშენზე ვიმუშავეთ მე და ჩემმა გიტარისტმა და მეგობარმა კრის რეფანომ. რაც შეეხება ვიდეოკლიპს, დიდი მადლობა მინდა გადავუხადო ქართულ ფროდაქშენ ჯგუფს A Vivre Sa Vie. ამ ადამიანებმა ზუსტად აღწერეს და გამოხატეს კლიპში ის, რისი თქმაც ამ სიმღერით მინდოდა. იმედი მაქვს, ყველას მოგეწონებათ ჩემი ახალი ნამუშევარი.”
ცოტა ხნის წინ ნინი ბრეგვაძემ ამერიკის ეროვნული საფეხბურთო ლიგის თამაშზე 70 000 მაყურებლის წინაშე აშშ-ის ჰიმნი შეასრულა. მანამდე კი მომღერალმა მსმენელს თავისი პირველი ქართულენოვანი სიმღერა და მასზე გადაღებული ვიდეოკლიპი წარუდგინა. „ძალა დამელია დარდით” ნინი ბრეგვაძემ საქართველოს მიუძღვნა. „გადავწყვიტე, ეს სიმღერა მიმეძღვნა ჩემი ქვეყნისთვის და ჩემი ხალხისთვის, რომელიც ძალიან, ძალიან მიყვარს და მენატრება,“ – უთხრა მომღერალმა Billboard საქართველოს.
