როგორც აღმოჩნდა, შეერთებული შტატების ყოფილი პრეზიდენტი ბარაკ ობამა Charli XCX-ის ცნობილი ალბომის, Brat-ის აქტიური მსმენელია. გასულ კვირას, მას შემდეგ რაც ობამამ ტრადიცია არ დაარღვია და ყოველწლიური საზაფხულო ფლეილისტი წარადგინა, მისი მუსიკალური სიყვარული Charli XCX-ის მიმართ საჯაროდ გახდა ცნობილი. პოდკასტში I’ve Had It სტუმრობისას ობამამ ბრიტანელ არტისტზეც ისაუბრა და აღნიშნა, რომ Brat არაჩვეულებრივი ალბომია.
„მეკითხებიან, მართლა ვუსმენ, თუ არა ამ მუსიკას,” – აღნიშნა ბარაკ ობამამ. „როგორც ადრეც განმიცხადებია, დიახ, ნამდვილად ვუსმენ. Charli XCX- მა იცის, რასაც აკეთებს.”
ობამამ საზაფხულო ფლეილისტი 12 აგვისტოს გამოაქვეყნა. სიმღერების ჩამონათვალში არის ბილი აილიშის Chihiro, ბიონსეს Texas Hold ‘Em, GloRilla-სა და Megan Thee Stallion-ის Wanna Be, 2Pac-ის How Do U Want It და სხვა ჟანრობრივად განსხვავებული ტრეკები.
ობამას გამოხმაურებასა და კამალა ჰარისის კამპანიისთვის Brat-ის გამოყენებას თუ გავითვალისწინებთ, Charli XCX ამერიკულ პოლიტიკას გაცილებით უფრო მჭიდროდ დაუკავშირდა, ვიდრე ამას ალბათ თავად ელოდა. ჯერ კიდევ მაშინ, როცა ბაიდენის მხარდაჭერით კამალა ჰარისი პოტენციურ საპრეზიდენტო კანდიდატად იქცა, ჰარისის X-ის ანგარიში Brat-ის თემებით გაფორმდა.
Charli XCX-მა ჟურნალ Vulture-თან თავისი მუსიკის აქტუალობაზე ისაუბრა და აღნიშნა, რომ არასდროს უფიქრია, თუ ოდესმე პოლიტიკასთან ასოცირებული არტისტი გახდებოდა. „მე ბობ დილანი არა ვარ და თავი ასეთად არც არასდროს გამისაღებია. . . ჩემი მუსიკა პოლიტიკური არ არის. რასაც ვაკეთებ, ყველაფერი ჩემ ხელოვნებას უკავშირდება. ყველაფერი, რასაც მე ვამბობ, ვიცვამ, ვფიქრობ, რითაც სიამოვნებას ვიღებ – ეს ყველაფერი ჩემ ხელოვნებასთან არის კავშირში. პოლიტიკა არ კვებავს ჩემ ხელოვნებას,” – განმარტა არტისტმა.
ნახეთ ვიდეო, რომელშიც ბარაკ ობამა Charli XCX-ზე და მის ნამუშევარზე საუბრობს:
Barack IS brat pic.twitter.com/wGCRaWyl1V
— I've Had It Podcast (@ivehaditpodcast) September 5, 2024
