2024 წელი ირლანდიური პოსტ-პანკ ბენდ Fontaines D.C.-სთვის ნაყოფიერი აღმოჩნდა. ივნისში ბენდი Glastonbury-ს ფესტივალზე გამოვიდა, გასულ თვეს კი Reading & Leeds Festival-ზე წარდგა. ბენდის მეოთხე სტუდიურმა ალბომმა Romance უდიდესი წარმატება მოიპოვა და ბრიტანეთის ალბომების ჩარტში მეორე ადგილი დაიკავა.
ახლახან ლეგენდარულმა ვარსკვლავმა ელტონ ჯონმა Apple Music-ის საკუთარ რადიო შოუში Rocket Hour ბენდის მისამართით დიდი სიყვარული და პატივისცემა გამოხატა.
Fontaines D.C.-ს ვოკალისტ გრიან ჩატენთან საუბრისას ელტონ ჯონი ქება-დიდებას არ იშურებდა: „დღეის მონაცემებით ჩემთვის თქვენ საუკეთესო ბენდი ხართ.”
„გლასტონბერიში თვალს გადევნებდით, მოვისმინე თქვენი ახალი ალბომიც. თქვენ მუდმივად იზრდებით და ვითარდებით, როგორც ჩანს, ამ ალბომით იპოვეთ თქვენი ჟღერადობა და ეს ყველაფერი ბრწყინვალეა.” – ამბობს ელტონ ჯონი Fontaines D.C.-ის მისამართით.
ელტონ ჯონმა Apple Music-ის რადიო შოუში Rocket Hour – Fontaines D.C.-ის ვოკალისტ გრიან ჩატენთან საუბრისას აღნიშნა: „ეს ალბომი ახალ საფეხურზე აგიყვანთ, სადაც, დარწმუნებული ვარ, დიდხანს დარჩებით. მასში მართლაც განსაკუთრებული მუსიკაა. გილოცავთ, გრიან, ეს საოცარია.”
Fontaines D.C.-ს მისამართით ელტონ ჯონისგან განსხვავებული, უარყოფითი შეხედულება აქვს მუსიკოს ლიემ გალაჰერს, რომელმაც ბენდი მას შემდეგ გააკრიტიკა, რაც Fontaines D.C.-ს ვოკალისტმა აღნიშნა, რომ ბენდ Oasis-ის გაერთიანებით დიდად აღფრთოვანებული არ დარჩენილა.
ირლანდიურ პოსტ-პანკ ბენდ Fontaines D.C.-ს ოთხი ალბომი აქვს გამოცემული: Dogrel (2019), A Hero’s Death (2022), Skinty Fia (2022) და Romance (2024). ყველა ალბომი ბრიტანეთისა და ირლანდიის ჩარტებში ტოპ 10-ში მოხვდა. მათი ბოლო ალბომი Romance პირველი ჩანაწერია, რომელიც ლეიბლ XL Records-თან თანამშრომლობით ჩაიწერა, ამ ლეიბლთან კი ისეთი ბენდები თანამშრომლობენ, როგორებიცაა Radiohead და The Prodigy.
მიუხედავად იმისა, რომ ბენდმა ვოკალისტის ხმის პრობლემების გამო რამდენიმე კონცერტი გააუქმა აშშ-ში, ისინი მალე აპირებენ ტურნეს გაგრძელებას. 2024 წლის ოქტომბერ-ნოემბერში Fontaines D.C. ევროპასა და დიდ ბრიტანეთში გამართავს კონცერტებს.
