ახალი სიმღერის, St. Chroma-ს წარდგენის შემდეგ Tyler, the Creator-მა რიგით მეშვიდე სტუდიური ალბომი Chromakopia დააანონსა, რომელიც 28 ოქტომბერს, ორშაბათ დღეს გამოვა, რათა დაასრულოს ინდუსტრიაში არსებული, ახალი მუსიკის პარასკევობით გამოშვების სტანდარტი. ახლა კი რეპერმა გულშემატკივარს მომავალი ალბომიდან მეორე სინგლი Noid და მასზე გადაღებული ვიდეოკლიპი წარუდგინა. კომპოზიციაში გამოყენებულია სემპლი ზამბიური ბენდის, Ngozi Family-ს სიმღერიდან Nizakupanga Ngozi.
მაშინ, როცა St. Chroma ტაილერის პერსონაჟს წარმოგვიდგენს, როგორც ლიდერს, რომელიც ჯარისკაცების არმიას ასაფეთქებლად გამზადებულ მწვანე კონტეინერში მიუძღვება, Noid სრულიად განსხვავებულ კონცეფციას გვთავაზობს, რომლის ტექსტშიც ტაილერი ცნობადობის უარყოფით მხარეებს ეხება.
ვიდეოს რეჟისორი თავად რეპერია. კლიპის დასაწყისში მისი პერსონაჟი ხალხის მასას მიაპობს, რა დროსაც მისი შეშლილი ფანი, რომელსაც The Bear-ის ვარსკვლავი აიო ედებირი განასახიერებს, მისკენ მირბის აიფონით, რომელიც პერიოდულად იარაღად გადაიქცევა.
პარანოიას ტაილერის გმირი სახლამდე მიჰყავს, სადაც მუსიკოსი იწყებს გარეპვას იმ შიშებზე, რომელიც მას თან სდევს და რაც ერთგვარი მინიშნებაა სამხრეთ კალიფორნიის სახლებში შეჭრის პრობლემაზე. ვიდეოს დასასრულს კი უკვე არასაღ გონებაზე მყოფი ტაილერის პერსონაჟი ქუჩაში ფეხშიშველი დარბის.
სიმღერას აქვს უფრო გრძელი ვერსიაც, სადაც დამატებულია კიდევ ერთი სტროფი, რომელშიც ტაილერი ცნობადობაზე თავისი უარყოფითი დამოკიდებულების შესახებ საუბრობს: „კამერები არა, გთხოვთ! სიმშვიდეში ჭამა მინდა, არ მინდა თქვენთან ფოტოების გადაღება,” – რეპავს მუსიკოსი.
ტაილერს საკმაოდ დატვირთული წლის დასასრული აქვს. როგორც უკვე დაანონსდა, 28 ოქტომბერს ალბომი Chromakopia გამოდის. ნოემბერში კი რეპერი Camp Flog Gnaw ფესტივალის ჰედლაინერი იქნება.
