შეერთებული შტატების ყოფილ პრეზიდენტ ბარაკ ობამას მნიშვნელოვანი მუსიკალური მომენტი ჰქონდა, როცა 22 ოქტომბერს კამალა ჰარისისა და ტიმ უოლცის შეხვედრაზე გამოვიდა. შეხვედრა დეტროიტში 2024 წლის საპრეზიდენტო არჩევნების კამპანიის ფარგლებში გაიმართა.
ობამა ემინემმა წარადგინა: „მე დღეს აქ ვარ რამდენიმე მიზეზის გამო. როგორც ბევრი თქვენგანისათვის ცნობილია, ქალაქი დეტროიტი და მშობლიური შტატი მიჩიგანი ძალიან მნიშვნელოვანია ჩემთვის. ამ არჩევნებში საკუთარი ხმის გამოყენება აუცილებელია. ამიტომ ყველას მოვუწოდებ, რომ არჩევნებში მონაწილეობა მიიღონ,“ – მიმართა ემინემმა აუდიტორიას. „ასევე ვფიქრობ, რომ ხალხს არ უნდა ეშინოდეს საკუთარი აზრის გამოხატვის. არავის სურს ისეთი ამერიკა, სადაც ადამიანებს ეშინიათ, თუ რა შეემთხვევათ საკუთარი აზრის ღიად დაფიქსირების შემთხვევაში. ვფიქრობ, ვიცე-პრეზიდენტი ჰარისი მხარს უჭერს ამ ქვეყნის ისეთ მომავალს, სადაც ეს და კიდევ ბევრი სხვა უფლება დაცული და გარანტირებული იქნება.“
Rapper Eminem introduces former President Barack Obama at a Detroit rally for Vice President Kamala Harris. pic.twitter.com/SGURWEGAMw
— MSNBC (@MSNBC) October 23, 2024
ამის შემდეგ სცენაზე ობამა ავიდა, სადაც აუდიტორიას ხუმრობით მიმართა : „უნდა ვთქვა, ბევრი შეხვედრა მაქვს გამართული. ასე რომ, ჩვეულებრივ არ ვნერვიულობ ხოლმე, მაგრამ ემინემის შემდეგ უჩვეულოდ ვგრძნობ თავს.“
ყოფილმა პრეზიდენტმა შემდეგ ემინემის ჰიტის, Lose Yourself-ის შესავლის გარეპვა დაიწყო. მხურვალე აპლოდისმენტების შემდეგ ობამამ იხუმრა: „მეგონა, ემინემი გარეპავდა და მე ამის ფონზე სცენაზე გამოვიდოდი.“
