Diddy-ს წინააღმდეგ კიდევ ორი ახალი სარჩელი შევიდა. ერთ-ერთი მათგანი რეპერს 10 წლის ბიჭის ნარკოტიკებით მოწამვლასა და მასზე სექსუალურ ძალადობაში სდებს ბრალს. სარჩელის თანახმად, შემთხვევა 2005 წელს ნიუ-იორკის ერთ-ერთი სასტუმროს ოთახში მოხდა.
სასამართლოში შესულია მეორე სარჩელიც, რომელიც კომბსს 2008 წელს Making the Band-ის 17 წლის კონკურსანტზე ძალადობაში ადანაშაულებს.
რეპერის ადვოკატები ახალ ბრალდებებს უარყოფენ და მოსარჩელეების ადვოკატ ენთონი ბაზბის, რომელიც სასამართლოში Diddy-ს მიერ სხვა დაზარალებულებსაც წარმოადგენს, სახელის მოხვეჭის მცდელობაში ადანაშაულებენ.
კომბსის იურიდიული გუნდის მიერ გავრცელებულ განცხადებაში ვკითხულობთ: „სიმართლე სასამართლო დარბაზში გამჟღავნდება, რომ ბატონ კომბსს არასდროს არავისზე უძალადია სექსუალურად, იქნება ეს კაცი, ქალი, ზრდასრული თუ მცირეწლოვანი.”
თავად 54 წლის რეპერი კი 16 სექტემბრის შემდეგ ნიუ-იორკის საპატიმროში იმყოფება და წაყენებულ ბრალდებებს უარყოფს.
10 წლის ბიჭი, რომლის ვინაობაც იდენტიფიცირებული არ არის, სარჩელის თანახმად, მსახიობი და რეპერი იყო, რომელიც მუსიკალური ინდუსტრიის წარმომადგენლებთან შესახვედრად მშობლებთან ერთად კალიფორნიაში ჩავიდა. კომბსთან მოსმენაზე მისულს კი მას ნარკოტიკებით მოწამლული გაზიანი სასმელი მისცეს, რის შემდეგაც რეპერმა მასზე სექსუალურად იძალადა. საბოლოოდ ბიჭმა გონება დაკარგა. ხოლო როცა გონს მოვიდა, Diddy-მ ის დააშინა, რომ ხმის ამოღების შემთხვევაში, მის მშობლებს ზიანს მიაყენებდა.
რაც შეეხება მეორე სარჩელს, მასში 17 წლის ასევე ანონიმური მამაკაცი ამბობს, რომ კომბსმა მასთან და მის დაცვასთან სექსუალური აქტი აიძულა. შემთხვევა Making the Band-ის სამდღიანი კასტინგის პერიოდში მოხდა – შოუს, რომლის პროდიუსერიც Diddy იყო. მას შემდეგ კი, რაც კონკურსანტი რეპერს არ დაეთანხმა, მისი, თქმით, ის კონკურსიდან გაუშვეს, რის შემდეგაც შვიდი წლის განმავლობაში მუსიკალურ ინდუსტრიაში დაბრუნება ვეღარ შეძლო.
სარჩელები ნიუ-იორკის უზენაეს სასამართლოში გენდერული მოტივით ძალადობის მსხვერპლთა დაცვის აქტის ქვეშ შევიდა, რომელიც ძალადობის მსხვერპლებს საშუალებას აძლევს, იჩივლონ იმ შემთხვევაშიც კი, თუ საქმის ხანდაზმულობის ვადა უკვე გასულია.
