ზურაბ ჟვანიას ფონდი აგრძელებს ახალგაზრდების მხარდაჭერას სახელოვნებო, ჰუმანიტარულ და სამეცნიერო სფეროში და 2024 წლის „წინანდლის პრემიის“ მოსაპოვებლად კონკურსს აცხადებს.
„წინანდლის პრემიის” მიღება შეუძლიათ 18-30 წლის ახალგაზრდებს შემდეგ ნომინაციებში: თეატრალური ხელოვნება, კინოხელოვნება, მხატვრული ლიტერატურა (პროზა), მხატვრული ლიტერატურა (პოეზია), მუსიკალური ხელოვნება, სახვითი ხელოვნება, ზუსტი და საბუნებისმეტყველო მეცნიერებები, ჰუმანიტარული მეცნიერებები.
განცხადებები 2024 წლის 7 ოქტომბრიდან 3 ნოემბრის ჩათვლით მიიღება. განაცხადის მიღების დეტალებისათვის იხილეთ ბმული.
„წინანდლის პრემიის“ ისტორია 1998 წლიდან იწყება. პრემიის დაწესების იდეა წინანდალში ახალგაზრდა შემოქმედთა შეხვედრა-სემინარზე დაიბადა. პირველი დაჯილდოების საზეიმო ცერემონია 1999 წელს თეატრალურ სარდაფში გაიმართა. პროექტს თავიდანვე აქტიურად უჭერდა მხარს პარლამენტის იმდროინდელი თავმჯდომარე ზურაბ ჟვანია. „წინანდლის პრემია“ სწორედ მისი პატრონაჟით ტარდებოდა. უკვე მრავალი წელია, პროექტს „ზურაბ ჟვანიას ფონდი“ წარადგენს.
„წინანდლის პრემიის“ გამარჯვებულები სხვადასხვა ნომინაციაში სპეციალურ საზეიმო ღონისძიებაზე გამოვლინდებიან. ლაურეატები დაჯილდოვდებიან დიპლომით, სხვადასხვა პრიზით და ფულადი პრემიით.
