ქანთრი მუსიკის დიდების დარბაზის წევრის, 78 წლის დოლი პარტონის სიმღერები ათწლეულების განმავლობაში ბილბორდის ჩარტში Hot Country Songs-ში მოწინავე ადგილს იკავებდა. რამდენიმე მათგანი დაუვიწყარ, ეპოქალურ ჰიტადაც იქცა, როგორიცაა: Three Doors Down, 9 to 5 და I Will Always Love You. 2020 წელს დოლი პარტონმა ავტორ და ჟურნალისტ რობერტ ოერმანთან ერთად წიგნი სახელწოდებით Songteller: My Life in Lyrics დაწერა, რომელიც მისი მრავალი სიმღერის შექმნის ისტორიას გვიყვება.
The Guardian-თან ახალ ინტერვიუში ქანთრი მუსიკის ლეგენდარულმა მომღერალმა იმ სიმღერებზე ისაუბრა, რომლებითაც ყველაზე მეტად ამაყობს.
„ყველა სიმღერით ვამაყობ,“ — თქვა დოლი პარტონმა, შემდეგ კი არჩევანი სამ ყველაზე საყვარელ სიმღერაზე შეაჩერა.
„ყველაზე პირადი ჩემთვის ალბათ Coat of Many Colors არის, რადგან ის დედაჩემზე, ჩემს მშობლებზე და ჩემს ცხოვრებაზეა. სიმღერა ისეთ თემებს მოიცავს, როგორებიცაა ბულინგი, მიმღებლობა და მსგავსი თემები. რა თქმა უნდა, ჩემი კიდევ ერთი ფავორიტი სიმღერა Jolene არის. ვიღაცამ მითხრა კიდეც, რომ ბოლო 52 წლის განმავლობაში ეს სიმღერა დაახლოებით 450-ჯერ ჩაიწერა. ამით ძალიან ვამაყობ. ჩემი ერთ-ერთი საყვარელი სიმღერაა ასევე I Will Always Love You, რომელიც სასიყვარულო სიმღერაა და ძალიან მიყვარს.” – ამბობს დოლი პარტონი ინტერვიუში.
სიმღერა Coat of Many Colors დოლი პარტონის მოგონებებით არის ინსპირირებული, თუ როგორ დასცინოდნენ მას სკოლაში, როდესაც დედამისის შეკერილი ქურთუკი ეცვა. დოლი პარტონის 1971 წლის ეს სიმღერა, ამავე სახელწოდების ალბომშია შესული. სიმღერამ ქანთრის ჩარტებში მეოთხე ადგილი დაიკავა, ხოლო თავად ალბომი Top Country Albums-ის სიაში მეშვიდე ადგილზე პოზიციონირებდა. რაც შეეხება სიმღერას Jolene, იგი 1974 წელს ჩარტების სათავეში აღმოჩნდა და 2014 წელს გრემის დიდების დარბაზში შევიდა.
ჰიტ სიმღერამ I Will Always Love კი მრავალჯერ დაიკავა Hot Country Songs-ის ჩარტებში მოწინავე ადგილი. პირველად ის ჩარტებში 1974 წელს მოხვდა, მეორედ 1982 წელს, 1995 წელს დოლი პარტონმა ვინს გილთან ერთად სიმღერის დუეტ ვერსია ჩაწერა, რომლითაც სიმღერა კვლავ ჩარტების მოწინავე ადგილზე აღმოჩნდა. აღსანიშნავია ასევე ამ სიმღერის უიტნი ჰიუსტონისეული დაუვიწყარი ვერსია, რომელიც ფილმ The Bodyguard-შია გამოყენებული. 1992-1993 წლებში ბილბორდ 100-ის ჩარტში სიმღერა 14 კვირის განმავლობაში ლიდერობდა.
1972 წელს საერთაშორისო ასოციაციიამ NSAI, დოლი პარტონს სიმღერისთვის Coat of Many Colors სიმღერების ავტორთა ჯილდო გადასცა. 2012 წელს სიმღერა ამერიკის კონგრესის ბიბლიოთეკის ეროვნული ჩანაწერების რეესტრში შევიდა, ხოლო 2019 წელს გრემის დიდების დარბაზში დაიმკვიდრა ადგილი.
