22 ნოემბერს რუსთაველის ეროვნული თეატრის ექსპერიმენტულ სცენაზე თანამედროვე ქართველი დრამატურგის, ბასა ჯანიკაშვილის 20 წლის წინ დაწერილი პიესის, „მშვიდობით, თემურ”, სპექტაკლის პრემიერა შედგა. გროტესკითა და შავი იუმორით სავსე პიესა აქტუალობას ახლაც არ კარგავს. მთავარი გმირი, ახალგაზრდა კაცი სახელად თემური, თავის მოკვლას გადაწყვეტს. სხვადასხვა პერსონაჟები სპექტაკლში ეტაპობრივად შემოდიან და ნაცვლად იმისა, რომ ახალგაზრდა კაცს თავის მოკვლა გადააფიქრებინონ, მას საქციელს უწონებენ და საკუთარი კეთილდღეობის გასაუმჯობესებლად თვითდესტრუქციისაკენ უბიძგებენ.
სპექტაკლის რეჟისორი ზურაბ გეწაძეა, თავად სპექტაკლი კი იმით არის მნიშვნელოვანი, რომ აქ შემოქმედებითი გუნდის უმეტესი ნაწილი სტუდენტია. სპექტაკლში მონაწილეობას მსახიობები კახა მიქიაშვილი და ვანო თარხნიშვილიც იღებენ, მსახიობთა დიდი ნაწილი კი თეატრალური უნივერსიტეტის სტუდენტები არიან: ვატო სანიკიძე, ირაკლი ჯიშკარიანი, მარიამ მღებრიშვილი, მაშიკო თვალაბეიშვილი, ნინი ურუმაშვილი, კესო დვალიშვილი და ნინა შონია.
სპექტაკლის რეჟისორი ზურაბ გეწაძე:
„პიესის თემა არის აქტუალური და ვფიქრობ, ბასამ ისეთი თემა მოძებნა, რომელიც ყოველთვის აქტუალური იქნება, რადგან ყოველთვის არიან ადამიანები ჩვენ საზოგადოებაში, რომლებიც ცდილობენ სხვის ტრაგედიაზე მოაწყონ თავიანთი ცხოვრება, იპოვონ სარგებელი. ძირითადი თემა არის ეს, თუმცა ეს არის შავი იუმორითა და აბსურდის ელემენტებით გაჯერებული. პრინციპში, მე რომ მკითხოთ, ეს კლასიკური ტრაგიკომედიაა.”
დრამატურგი – ბასა ჯანიკაშვილი:
„როგორც აღმოჩნდა, ეს პიესა დაწერილია 20 წლის წინ. ნამდვილად არ მახსოვდა და ნამდვილად არ მეგონა, რომ ასე მალე გავიდა დრო. პიესა არის იმაზე, რაც 20 წლის წინ ხდებოდა, თუმცა, აღმოჩნდა, რომ დღესაც აქტუალურია ეს თემა. ჩვენს რეჟისორთან, ზურაბ გეწაძესთან ერთად ვიმუშავეთ, შევცვალეთ პატარა რაღაცები და იმედი მაქვს, მაყურებელი კარგად მიიღებს ამ სპექტაკლს.”
აბსურდის ელემენტებითა და შავი იუმორით გაჯერებული სპექტაკლი ნათლად წარმოაჩენს ადამიანის ხარბ, ანგარებიან თვისებებს, რომელიც სიკვდილისთვის წირავს კაცს, რათა საკუთარი ცხოვრება გაიუმჯობესოს.
რუსთაველის ეროვნული თეატრის ექსპერიმენტულ სცენაზე სპექტაკლი „მშვიდობით, თემურ” 25 და 28 ნოემბერსაც გაიმართება. ბილეთების შეძენა კი ამ ბმულზეა შესაძლებელი.
