ალიშა კისი გახდება 2025 წლის Dr. Dre-ს სახელობის ჯილდოს, Global Impact Award-ის მფლობელი ხმის ჩამწერი აკადემიის მეოთხე ღონისძიებაზე, რომელსაც შავკანიანთა მუსიკის კოლექტივი წარმოადგენს. ცერემონია 30 იანვარს ლოს-ანჯელესში შედგება.
Dr Dre-ს სახელობის ჯილდო 2023 წელს დაწესდა, რათა პატივი მიაგოს არტისტებს, რომელთა გავლენა მუსიკის საზღვრებს სცდება. ის ასევე ითვალისწინებს მუსიკოსების სამეწარმეო მიღწევებს, ფილანთროპულ ძალისხმევასა და მათ გლობალურ გავლენას. 2023 წელს პირველი ჯილდოს მფლობელი თავად Dre გახდა. მას მოჰყვა ჯეი-ზი, რომელმაც სცენიდან გრემის ჟიურის უსაყვედურა, რომ მის მეუღლეს, ბიონსეს, აქამდე არასდროს გაუმარჯვია წლის ალბომის კატეგორიაში.
რაც შეეხება კისს, იგი ნომინირებულია 2025 წლის გრემიზეც – საუკეთესო თეატრალური მუსიკალური ალბომის კატეგორიაში მიუზიკლისთვის Hell’s Kitchen, რომელიც თავად კისის კარიერას ასახავს და მის სიმღერებს მოიცავს. მიუზიკლის პრემიერა ნიუ-იორკის შუბერტის თეატრში 20 აპრილს შედგა.
„უკვდავი მუსიკიდან დაწყებული, სხვების დახმარების მტკიცე ძალისხმევით დასრულებული, ალიშამ დიდი გავლენა იქონია მსოფლიოზე,” – წერს ჰარვი მეისონი, ხმის ჩამწერი აკადემიის აღმასრულებელი დირექტორი. „ალიშა განასხეულებს იმ ყველაფერს, რასაც Dr. Dre-ს Global Impact Award წარმოადგენს: მის ხელოვნებას არ აქვს საზღვრები, მისი მოღვაწეობა იწვევს მნიშვნელოვან ცვლილებებს, მისმა გავლენამ კი სიღრმისეულად მოახდინა კულტურის ფორმირება. ჩვენთვის პატივია, აღვნიშნოთ მისი განსაკუთრებული მემკვიდრეობა და წვლილი, რომელიც დღემდე შეაქვს მუსიკაში და მის მიღმა.”
კისი ჯამში 16 გრემის მფლობელია. 2002 წელს მან ხუთი გრემი მოიგო, მათ შორის იყო ჯილდო საუკეთესო ახალი არტისტისა და წლის სიმღერის კატეგორიაში ჰიტით Fallin’. 21 წლის კისი იმ დროისთვის წლის სიმღერის ნომინაციის ყველაზე ახალგაზრდა გამარჯვებული გახდა.
ალიშა კისს Billboard Hot 100-ის ოთხი ლიდერი ჰიტი და Billboard 200-ის ხუთი ლიდერი ალბომი აქვს.
